Angayan bang i-ignore ang mga survey

Usa sa dakung sayop ni Marcos, mao ang waa niya pagpanumbaling sa sentimento sa katawhan, ang iyang pag-ignore sa mga survey nga gihimo nga nagpakita sa pag-us-os sa iyang popularity ug approval rating.

Kompiyansa siya, ug nagsalig siya tungod kay diha kaniya ang military, ug iya ang tanang local officials. Hinumduman nga tapus sa pagpusil patay ni Ninoy, nagkadaghan ang katawhan nga mipakita na sa ilang kasuko kang Marcos.

Hinumdom ko nga sa pag-anhi ni Cory sa Cebu, ang mga tawo naglaray sa kadalanan, gawas sa nanguyog, gikan sa Mactan Airport, sa Mandaue City, hangtod na sa Cebu city proper, waay putol.

Apan, waa kini makatandog ni Marcos, kaylagi, diha man kaniya ang mga barangay captain, ang mga konsehal, ang mga mayor, ang mga gobernador ug mga Congressmen sa tibuok nasud.

Morag mao kini karon ang atong kahimtang. Morag gi-ignore ang mga survey. Gikataw-an ang oposisyon, ug giisip nga mga de-stabilizer ang mga tawo nga mopahungaw sa ilang hunahuna batok sa kagamhanan.

In fairness, samtang atong nakita ang mga paningkamot ni Gloria nga magkahiusa ang atong nasud, aron nga makapadayon na ta sa unahan, aduna say mga elemento nga nakapaaslay ug nakapatibulaag sa katawhan.

Kinahanglan, una sa tanan, sutaon nila pag-ayo ang tinuod nga sentimento sa katawhan. Ilabina ang silent majority. Ilang klarohon kon tinuod ba gyud ang resulta sa mga survey kay tingali unyag tinuod ni. Dili nila i-outright pag-ignore sama sa nahitabo panahon ni Marcos. Di siya magpadaa sa mga propaganda nga gihimo sa iyang mga tawo within.

Sa ako nang giingon, di nato sublion ang nahitabo panahon ni Marcos. Di kaayo ta magsalig 100 percent sa mga pahiyom sa mga local officials, kay anytime, magkinaunsa ang panahon, mobalitok dayon ni sila.