EDITORYAL - Vigilante mantsa sa Sugbu

Malampusong natapos ang selebrasyon sa Sinulog kagahapon, manghinaut kitang dunay maayong kasinatian ug halandumon nga napatik sa huna-huna dili lang sa mga Sugbuanon kundili lakip na sa mga turista ug bisita sa maong selebrasyon.

Ang Cebu City nabantog dili lang sa dried mango, otap ug uban pang lagutmon nga pasalubong sa mga minahal, kundili lakip na sa labing dakong selebrasyon panahon sa pista ni Senyor Sto. Niño nga giabayan usab sa pagpahigayon sa Sinulog.

Unta ang maayong mga halandumon dinhi sa Sugbu dili matabunan sa mga balitang makalilisang kabahin sa nagkaanam karon kadaghang biktima sa inhustisya nga binuhatan sa mga gidudahang "vigilante" nga mitipi na og gibana-banang 110 ka mga tawong dunay mga criminal records.

Subo kaayong palandungon nga ang maayong rekord kaniadto sa Sugbu namantsahan karon sa maong pagpamatay.