Bugo ang mailad

Mga suki, makadaghan na nato tukia dinhi ang nagkadaiyang estilo sa modus operandi sa mga mangingilad nga sakop sa grupong Budol-budol Gang. Maoy sagad nilang estilo ang paggamit og budol money nga maoy ilang ihaylo sa ilang prospek. Daghan na ang nabiktima niini.

Kalabot niini, usa ka magbabasa ang mi-text kanako aron pagpagawas sa iyang opinyon kalabot sa mga tawo nga nabiktima sa Budol-budol. Alang kaniya, bugo ang mailad sa Budol-budol. May punto usab hinuon siya apan dili sab kita makabasol sa mga nabiktima. Unsaon nga maayo man usab kaayong mobulatik lagi ang mga kanahan kaayong mangingilad.

Nia ang iyang text: "Kana bang mangilad nga magpakita og daghang kuwarta. Bugo ra sad kaayo ang tawo nga ilang mailad kay naa ba goy manghuwam og kuwarta nga aron dili makabalibad ang ilang gihuwaman ilang ibilin ang ilang bag nga puno sa kuwarta? Hunahunaon sad unta kana sa gibiktima nga kon dili pa kana ilad, nganong manghulam pa man sila og kuwarta nga puno man kaha sa kuwarta ang ilang bag nga gidala? Mao nga magbantay gyod kita ug utok ang gamiton nato." -- 0926-7692564

May punto ka sab, higala. Pero dili gyod nato mabasol ang mga biktima niining maong estilo sa modus. Daghang mga edukado ug utokan nga mga tawo nga nalingla gihapon sa Budol-budol Gang ug kana tungod kay maayo sab lagi kaayog diskarte kining maong mga mangingilad.

Sa gula sa basahon nga Awake niadtong Hulyo 22, 2004 giingon: "Remember that swindlers successfully defraud highly intelligent people -- heads of State, bank managers, executives, finance managers, attorneys, and others." Walay gipili ang mga mangingilad. Ug bisan unsa ka pa ka utokan, sa higayon nga mahasulod ka sa laang sa mangingilad, mailad ka gayod. Mao nga magbantay gayod kanunay aron dili malingla sa malit-agong mga mangingilad.

* * *

Sa laing bahin: "Good day, Sir. About NSO! Tinuod gyod nang mga fixer, Sir. Nagkuha kog marriage contract. P70.00 ra sa ilang accounting ang bayad. Pero kon moagi gani sa fixers, P170.00 na." -- 0918-4689130

Grabe gyod kining maong panapi sa mga fixers. Ang pangutana kon nganong gipasagdan man lang kanang maong mga fixers nga magpadayon sa ilang modus operandi? Wala ba gayod diay mahimo ang mga tigpatuman sa balaod batok nianang maong mga tawo nga naghatag og puwerhisyo sa atong kaigsuonan nga may ipahigayon nga transaksiyon diha sa NSO? Pangutana ra kini. Ayaw kamo kasuko.

* * *

Sumbong ug reklamo? Text sa 0910-8105522)