EDITORYAL – Maayong susihon

Unsa kahay nakaon ni Bagong Buhay Rehabilitation Center Teofilo Labating Jr? Wala man siya mokuha og permiso sa korte pagpabiyahe kang Guillermo Wapille, kadtong kanhi polis nga gikonbikto sa korte sa pagpatay sa peryodistang si Edgar Damalerio niadtong 2002 sa Pagadian.

Angayan lang nga ipasabot ni Labating ngadto ni Cebu RTC Judge Ramon Codilla nganong nagbuotbuot siya og pagpabiyahe ni Wapille ngadto sa Pagadian nga wala mananghid kaniya nga siya man ang naminaw ug mikonbikto sa kanhi polis.

Dili paigo ang gipangayong pagpasabot (explanation) gikan ni Labating, angayang susihon sa mga labaw niya sa Bureau of Jail Management and Penology kun unsay nagtukmod niya pagpadala ni Wapille ngadto sa Mindanao nga walay pananghid sa korte.

Ang gibuhat ni Labating kalapasan sa kasamtangang proseso sa korte nga angayang mahibaw-an sa mga opisyal kang kansang trabaho nagkinahanglan nga aduna siyay kasayuran.