Ang Juda's belt

Matag new year's eve, dayon nang dawat sa bag-ong tuig, maningkamot gyud mi sa among pamilya nga makasaksi sa revelry, sa ka-saba'pag-bid goodbye sa daang tuig ug pag-welcome sa brand new nga tuig. Ug natural, bisag nagkamahal ang mga pabuto matag tuig, moapil gyud mig pabuto, but with much care aron kalikayan ang pagkaputol sa among mga tudlo.

Tuod man, apil gyud mi sa ka-alegre pagdawat sa bag-ong tuig. Ug sukad pa sa unang mga panahon, kaylagi, taga-Opon man ko, adto gyud mi mamalit sa Opon og mga pabuto.

Ug bisan og midagsang na ang mga nindot kaayong imported nga mga pabuto, sa Opon gyud gihapon mi mamalit kay mahal kaayo alang kanamo ang maong mga makalingaw kaayo nga mga fireworks.

Apan, karong tuiga, waa mi kapamalit sa Opon, ug nag-last minute mig pamalit sa nagkalata nga display sa sidewalk. Ug tungod kay ganahan man gyud ko ining Juda's belt sukad sa bata pa ko, ni-insistir gyud kog papalit sa akong mga anak niini. Tuod man, lipay kaayo ko nipalit gyud sila.

Kahibawo ka Dro unsay nahitabo? Kagar ang napalit. Mahal ra ba kaayo. Bisag giunsa nakog duslit, waa gyud mobuto. Among gidauban kay tingalig na-basa' lang ang pabilo hinungdan nga waa maka-ignite sa dagkung libintador … apan, waa gyud.

Pagkabuntag, akong gihiling, gibungkag, ug maoy among nakita nga pulos papel ang gilikit, waay pulbora. Atong ma-imagine nga tungod kay kuti kaayo ang pag-porma sa Juda's belt, gihagoan gyug himo ang maong mga fake o kagar nga pabuto.

Atong makita dinhi ang ingenuity unta sa Pinoy, Apan, motumaw gyud ang atong pagka-tikasan. Hain man ta maliwat Dro? Diin man nato masunod kining atong pagka-tikasan? Diin man nato ni ma-inherit?

Ang nakadaot ra ba kay ang uban natong mga kaigsoonang tikasan mahimong opisyal sa gobiyerno, ang uban ma-elected to a public office … maoy hinungdan nga naila kita nga most corrupt nga country dinhi sa Asia.

Ang nagkugig himo og kagar nga Juda's belt, ug ubang matang sa pabuto, ginagmay lang ni, bali lang og pila ka peso. Apan ang corruption sa uban natong kaigsoonan, dili kay minilyon lang, kondili, binilyon gyud.

Unsaon man tuod nato pag-asenso ini nga gikan sa tighimog pabuto, ngadto na sa uban natong mga lider, corrupt man? Nagka-pareha lang tanan ini, Dro.

Anyway, next time around, ayaw gyud mog pasagad og pamalit og mga pabuto, ilabina diha sa mga sidewalk. Ako, sukad sa among pagpamalit sa among suki sa Opon, wa gyud mi kasuway og kagar. And that was 30 or so years ago.