Pangawat

James A. Feehan

Dili tiaw ang silot nga matagamtaman ni bisan kinsa nga masakpan nga mangawat sa mga nasud kang kansang tinuohan mao ang Islam. Ang uban putlan sa kamot, samtang ang uban bitayon hangtud sa kamatayon. Usa ka batan-ong lalaki ang nakombikto sa pagpangawat og usa ka buok pan. Sa bisperas sa iyang pagbitay, gitugotan siya nga mohimo og kataposang hangyo. Siya miingon ngadto sa Hari: "Kamahalan, buot ko unta nga itanom ang usa ka liso sa kahil sa mismong lugar diin siya bitayon ug nga kining maong liso motubo og mamunga sulod lamang sa usa ka gabii." Nianang sayong kabuntagon, nagpunsisok ang mga tawo sa plaza kuyog sa hari og sa iyang mga ministro. Gilungag ang usa ka bangag aron itisok ang liso. Samtang itisok na unta kini sa batan-on, nagdumili siya sa paghimo dungan sa pag-ingon: "Kamahalan, dili ako makahimo sanglit ang bugtong makapabuhi niini mao ang mga kamot nga wala gayud makapangawat. Gisugo sa hari ang iyang ministro sa Hustisya apan kini nagdumili sanglit nakapangawat man lagi siya sa gamay pa siyang bata. Gisunod ang pangulo sa mga polis apan nibalibad kay nangawat siya og mansanas sa ulitawo pa siya. Ang hari nidumili usab kay nakapanguha siya og gamit sa iyang amahan. Ang batan-on miingon: "Kamong mga inila og mga tinamod ning atong katilingban, nakapangawat og bisan unsa sa usa ka bahin sa inyong kinabuhi. Ug ako ania nga nakapangawat og usa ka buok pan aron lang mabuhi silotan man ninyo sa kamatayon." Nalipay sa kaalam sa maong batan-on ang hari mipasaylo kaniya.

Pamalandong

Dili sa tanang higayon nga kadautan ang nagtukmod sa tawo aron siya manghilabot kondili apil na pud niini ang kalisud. Subo lang gyud palandongon nga mga yanong kawatan lamang ang mga nasilotan og dili silang mga mahilabtanon sa dinagkong mga butang. Angayan tingaling atong tan-awon og pamalandongon ang matang sa sistemang gisunod. Timan-an nato: "Walay kawatan kon walay magpakawat og walay kawat kon husto lang unta ang pagbahig sa katigayonan sa nasud. Walay gutomon kon walay mga bentahoso. Mao nga dili gyud maayo ang mamentaha og ipahid ang sala ngadto sa uban labina ning pasko sa Pagkatawo sa atong Ginoo.