Pari nga hingasaba

Angay ba god nga mahiubos ang usa ka pari ngadto sa mga lumulopyo sa iyang parokya kon adto kini magtambongan og misa sa uban nga simbahan?

Kon ako ang pangutan-on, dili ug wala gayo'y katungod ang usa ka pari nga masuko sa mga tawo nga wala ganahi mosimba sa simbahan nga iyang gidumala, ilabi na og siya ang mopahigayon sa misa pwerte ka hingasaba.

Dunay mga tawo nga hilasan kaayo maminaw sa usa ka pari nga kanunay lang mangasaba atol sa iyang wali. Resulta, kining matanga sa pari gisaway sa hilom sa katawhan diha sa iyang parokya.

Ang mga nagpakaila niining maong pari mihulagway kaniya nga daw sa daku na g'yod kaayo ang iyang bilib sa kaugalingon nga daw sa siya na lang ang makamao.

Mangasaba sa mga manimba kon duna siya'y dili magustohan. Wala niya huna-hunaa nga kadtong mga tawo nga gibuhatan niya, wala makauyon og hinungdan nga namalhin kini pagsimba sa laing simbahan.

Aw hinoon, ang kadagkoan sa Kaparian nagtan-aw man sab sa kalidad sa ilang mga pari. Kadtong mga pari nga ngilngig og abilidad, ilabi na sa pagpahigayon og nindot nga wali, adto ibutang sa mga nindot nga parokya.

Kadtong mga pari nga laksot kaayo paminawon nga mohimo og wali, aw adto ra usab ibutang sa mga gagmay'ng parokya apan makapasamot kini kaut-ot sa gidaghanon sa mga manimba.

Nakapaminaw ko sa wali ni Monsenyor Esteban Binghay dihang mao pa kini ang Kura Paruko sa simbahan sa Sto. Rosario Parish, hilabihan kanindot niini mohimo'g wali.

Mao man gani nga ang mga misa ni Monsenyor Binghay diha sa Sto. Rosario kaniadto, hugopan gayod sa manimbahay. Dili kay ako ra ang midayeg.

Basin moingon mo nga maayo modala'g wali si Binghay kay monsenyor na god. Ang kauban namo sa media kaniadto, si Rev. Fr. Dan delos Angeles nga bag-o pa kaayong nahimong pari, pagkanindot mohimo'g wali.

Apan kining pari sa usa ka parokya dinhi sa north district sa dakbayan sa Sugbo - dili lang usa nako ilhon - mangyamiid ang ubang manimba.

Gihulagway nila kini nga hilabihan kaestrikto. Gitug-anan ko sa pipila ka nagpakaila niining maong pari sa iyang matud pa mga "gwatsinanggo" nga kalihukan.

Aw hinoon, dili dayon ko dali nga motoo. Human nako madawat ang report kabahin sa maong pari, ako dayon nga gipahimoan og hilom nga pakisusi sa mga higala nako nga may katakus pagpaniid. Huwaton nato ang resulta.

Dili usa ako motoo dayon nga kini kunong maong pari dali nga maibog og "chicks." Sa ako na nga giingon, huwaton lang nato ang tukmang panahon. Gikuyawan ko og sundon niya ang binuhatan sa laing pari sa maong parokya kaniadto nga ang gipamabdosan anak sa lay minister.

Nagpabilib ra ba kining maong pari nga kwartahan. Mikuot g'yod kuno siya og usa ka milyon ka pesos gikan sa iyang bulsa aron ipuhonan pagpalapad sa gidumala niya nga simbahan.

Bravo!, kon wala lang mamakak ang maong pari. Pagkadalaygon sa iyang binuhatan. Tiaw mo, usa ka milyon ka pesos nga gikan kuno sa iyang bulsa gigamit niya isip puhonan sa pagpadaku sa simbahan?

Tagsa ra'y pari nga mohimo niini. Dili unta ko gusto nga motuki niining maong isyu apan tungod kay daghan man ang mireklamo niining maong pari, ako na lang gipaundayonan.

Sagdi lang, hinay-hinayon nato sa pagtukas ang tabil nga nagsalimbong sa pagkatawo niining maong pari.