Bantay bata kuno

Mga suki, karong panahona nga nauso pag-ayo ang cellphone, daghan usab ang mga binuang pinaagi sa cellphone. Dili lang mga text nga binastos ang posible natong madawat. Ang labing kuyaw kining text nga pangilad. Ang pangilad pinaagi sa text gihimo sa daghan ug nagkalainlaing paagi.

Niadtong October 30, 2005 nakadawat akog text nga maingon tang usa ka pangilad. Mahimong gikomedyahan lang ko sa texter nga nagpadala sa maong mensahe, agig sungog kanako isip kolumnista sa Modus. Apan kon kining maong estilo iyang gihimo ngadto sa lain, posibleng makalingla ug makailad siya.

Ang iyang text kanako nagkanayon: "Ang Bantay Bata ay kumakatok sa inyong mga puso. Just type 0921-7348734 (space), your donation (5, 10 or 15) and send to 808. Tandaan mo: ang tumutulong sa kapwa ay pinagpala." -- 0921-7348734

Yano lang kaayo ang maong text kon imong aninawon pag-ayo. Apan kon magpalipat ka, mailad ka gyod. Ug tingali, daghan na ang gibuhatan sa ingon sa maong texter ug nakalusot ang iyang tinonto maong nahigalam.

Kon inyong mamatikdan sa iyang text, ang numero sa cellphone nga i-type segun sa iyang instruksiyon mao ang kaugalingon niyang cellphone number. Unya ang maong numero lab-angan og space unya i-type na usab ang imong donation (5,10 or 15) ug ipadala ngadto sa 808. Dako kining binuang kay klaro man nga mao kini ang sistema sa pasaload.

Ang dili dayon makabantay niining maong estilo sa modus operandi seguradong mailad gayod. Maka-pasaload gayod siya ngadto niining numero nga 0921-7348734. Hayahay kaayo kining tawhana. Wala siyay gasto sa load sa iyang cellphone kay magpa-pasaload man lang siya pinaagi sa pangilad. Bantayi ninyo kining numero kon mo-text kini diha sa inyong mga cellphone.

* * *

Sumbong ug reklamo? Text sa 0910-8105522)