Modus sa sementeryo

Sa akong pagsulat niining lindog, mao gayoy pagkatapos sa kasaulogan sa kalagkalag. Gisulat ko kini tungod kay dili ko buot nga paaboton pa ang laing Kalagkalag ayha ko pa hatagi pagtagad kining daghang sumbong nga akong nadawat nga ilang nadiskubrehan sa miaging Kalagkalag.

Usa sa mga reklamo nga akong nadawat mao nga kadtong mga panteyon nga gitukoran og balay-balay, gipangtiltil ang semento ug gikuha ang mga kabilya nga gilubong sa maong semento. Ang mga puthaw sab nga gihimong rehas sa balay-balay sa nitso gipanggabas sa mga kawatan og puthaw. Ang mga reklamante nagtuo nga gipatimbang sa mga kawatan ang maong mga kabilya ug puthaw sa usa ka junk shop.

Laing reklamo nga akong nadawat niadtong miaging Kalagkalag mao nga adunay mahalon nga mga lapida nga nangawagtang. Gikuha kini sa mga badlongon sa katilingban ug posibleng gibaligya usab. Alang-alang man kon unsay ilang buhaton niadto gawas sa pagbaligya. Dili ba, mga suki? Nagtuo ang mga reklamante nga maoy ipasalir sa mga badlongon sa katilingban sa ilang operasyon panahon sa kagabhion ilabi na sa panahon nga mag-ulan-ulan.

Ang mas grabe mao kining modus operandi sa pagpangguba sa mga nitso. Mas daghan kog nadawat nga reklamo mahitungod niini. Ang estilo mao nga pilion sa mga badlongon kadtong nitso nga sa ilang tan-aw, morag kuwartahan o tubig-tubigan gayod ang mga tagtungod.

Atol sa lawom nang kagabhion ang ilang ipahigayon sa maong operasyon. Gub-on nila ang nitso pinaagi sa pagtiltil, pagsilsil ug pagmaso niini. Ang ilang tuyo mao ang pagkuha sa bisan unsang bililhong butang nga ilang gituohan nga gipadala sa mga tagtungod ngadto sa lungon sa minatay. Nabatasan man god usab sa atong kaigsuonan nga "pabawonan" nilag mahalon nga mga alahas, salapi ug bisan unsang mahalon nga mga butang ang ilang mahal sa kinabuhi nga namatay.

Mao usab kini ang gikompasan sa mga badlongon sa katilingban. Ilang gub-on ang mga nitso aron pagkuha sa bililhong mga butang sa sulod sa lungon. Inigduaw sa tagtungod, mao na lamay ilang madiskubrehan nga nabuhang o naguhab na ang nitso sa ilang minatay tungod kay gilungkab man kini sa mga kawatan.

Sumala sa report nga akong nadawat, nakaabot na kining maong modus operandi bisan sa hilit nga kalungsoran ug kabaryohan diin adunay nahimutang nga sam-ang. Aduna ganiy pipila nga mi-text kanako nga nagtuo nga posibleng kakunsabo (kuno) sa mga badlongon ang sepultorero. Dili lang una ko mokomentaryo mahitungod niini. Ang importante mao nga masumpo na unta kining mga kawatan nga manglungkab og mga nitso.

Sumbong ug reklamo? Text sa 0910-8105522)