Dili kini ikahibulong kay ang mga mangingilad larino gayod nga motalo-talo aron madani ug mapatuo gayod nila ang tawo nga buot nilang ilaron. Mao nga ang importante mao nga makabantay kita batok sa nagkadaiyang estilo sa modus operandi sa mga mangingilad aron dili kita mailad.
Usa sa mga modus operandi nga misalir karong panahon sa ting-ulan mao kining pagpanghatag (kuno) og payong. Ang estilo mao nga samtang maglakaw ka sa aseras, adunay duha ka mga lalaki (kapin sa 20 ang edad) nga mosugat kanimo dayong tunol og papel. Dili pa gani nimo madawat ang papel nga gitunol, moesplikar na dayon ang usa kanila nga manghatag (kuno) sila og payong.
Ang usa mopasabot nga konektado sila sa usa ka dakong kompaniya. Agig pasalamat ngadto sa katawhan nga namalit sa ilang produkto, manghatag silag mga butang nga mapuslan sa katawhan (sama sa payong). Ipasulat nila sa usa ka notebook ang imong ngalan ug dad-on ka ngadto sa usa ka dapit adto kuno nimo ma-claim ang imong payong.
Ayaw gayod pagkuyog kanila bisan asa ka nila dad-a. Kay sa higayon nga mokuyog ka, nahasulod ka na sa ilang lit-ag. Ug ulahi ka na lang makaamgo nga nakuwartahan ka na diay sa mga kanahan. Ug wala kay madawat bisan anino na lang sa gipagarpar nilang payong. Pagbantay kamo niini.
Nindot unta kon tinuod man kini. Pero dili maayong motuo kita gilayon niini. May pasidaan na ra ba ang Bangko Sentral nga dili gyod tuohan ang bisan unsang text nga mogamit sa ilang ngalan. Dugay nang nakaabot sa kasayoran sa BSP nga may migamit sa ilang ngalan sa tinonto. Mao nga dili gayod maayo nga magpadala kita sa haylo sa mga mangingilad. Kataw-an lang kita sa mga badlongon kon ila kitang mabiktima.