Cellphone ang target

Nunot sa pag-uso karon sa mga cellphone, hapit kada adlaw kitang makadungog og balita mahitungod sa mga kaso sa panglabni, panghold-up ug panguot diin ang kasagaran nga makuha gikan sa biktima mao ang iyang cellphone. Daghan usab og taktika ang mga badlongon sa katilingban nga ang target sa ilang modus mao ang cellphone sa ilang prospective victim.

Dugtong niini, akong hatagan og pagtagad kining usa ka text message nga gipadangat dinhi sa akong lindog sa usa ka magbabasa. Ang iyang text nagsumbong bahin sa modus operandi sa mga tawong daotan nga ang cellphone maoy target. Ang text nagkanayon: "Good day. Naa koy i-contribute sa imong column nga Modus sa mga badlongon. Cellphone ang ilang target. Magpakaaron-ingnon sila nga kustomer sa usa ka tindahan nga ilang biktimahon. Moorder kini sila og daghan kaayo. Lingawon ra ka sa estorya. Sa higayon nga busy kaayo og andam ug atiman ang mga tig-alagad sa tindahan sa iyang gipamalit, anha na siya molihok. Mahimong ang taga tindahan o sama kaniyang kustomer ra usab ang iyang biktimahon. Makuha na gani niya ang iyang tuyo, moingon dayon siya: 'Palihog lang kog kuwenta niini kay ako lang balikon.' Unya mosibat na siya dayon. Naay nabiktima niya diri sa Toledo. From Ahwie Lebumfacil." -- 0918-6332624

Bantayanan gayod kining maong modus operandi. Ayaw gayod kamog kompiyansa ilabi na kon may dala kamong cellphone sa inyong pagsulod sa usa ka tindahan. Sayon ra kaayo kining matiktikan sa mga badlongon sa katilingban. Ayaw'g kompiyansa kon may tawo nga mopaduol kanimo nga kadudahan ang mga lihok. Kinahanglang listo ug igmat ka kanunay.

* * *

Sa laing bahin, nia pa gyoy laing reklamo gikan sa usa ka cellphone subscriber. Sama sa ubang text nga akong nadawat, hatagan ko gihapon kinig luna dinhi sa akong lindog aron magsilbing kamot nga manuktok sa pultahan sa kasingkasing sa mga network provider.

Ang text nagkanayon: "Sir, Uriel, nakabasa ko sa imong column bahin sa gihimo sa Smart. Subscriber pod ko sa una sa nahisgotan nga network pero karon napugos kog balhin sa Globe tungod nianang ilang gihimo. " -- 0916-3432589 (Sent: October 22, 2005--11:36:50)

Manghinaot ko nga dili ka na magkaproblema sa imong pagbalhin sa Globe. Nakadawat ra ba sab kog daghang reklamo kabahin sa maong network. Ang network nga wala pa koy nadawat nga reklamo mao ang Sun Cellular. Aw, ambot lang kaha.

* * *

Sumbong ug reklamo? Text sa 0910-8105522)