Nangatulog mo?

Mitaas kuno ang crime volumes sa mga Index Crimes sa probinsya sa Sugbo sa ikatulong quarter karong tuiga. Ngano man? Kinsa kaha ang mabasol ani?

Maayong sutaon ni gobernador Gwendolyn Garcia kon kinsa ang responsable nga wala makakontrolar sa pagsaka sa gidaghanon sa mga krimen sa kalungsuran.

Alang niadtong wala kaayo makasabot, ang pagsaka sa gidaghanon sa krimen dili angay'ng kabalak-an kon ang midaghan mao ang gitawag og mga non-index crimes.

Apan kon ang misaka mao ang mga Index Crimes, angay kita nga mabalaka tungod kay nagpasabot kini nga pakyas ang atong kapolisan sa pagmentinar sa kahusay ug kalinaw sa ilang tagsa-tagsa ka dapit.

Gibahin man god nila og duha ka matang ang mga kaso. Kini mao ang Index Crimes ug Non-Index Crimes.

Ang gitawag nila og mga Index Crimes mao kadtong mga crimes against persons and properties, sama sa Murder, Homicide, Parricide, Robbery, Theft, Rapes ug ang Kidnapping.

Ang physical injuries atua na gani nila gibutang sa non-index crimes. Ang sagad g'yod sa mga kaso nga nasakop sa non-index crimes naglakip sa mga kalampusan sa pagpatuman sa balaod, ilabi na sa mga malapason sa mga special laws.

Sa ato pa, kon ang atong mga polis abtik sa pagpanakop sa mga tawo nga malapason sa balaod sa illegal nga sugal, illegal nga drugas ug uban pang mga special laws, mosaka gayod ang crime volumes.

Ang mga kaso, ma-Index Crimes man o Non-Index Crimes, pareho nga matipon sa gitawag og Crime Volumes.

Sa probinsya sa Sugbo, ang rekord nagpakita nga gikan sa kapin lang sa 500 nga crime volumes sa mga buwan sa Hulyo, Agosto ug Septembre kaniadtong miaging tuig, sa samang termino karong tuiga miabot na og hapit usa ka libo ka kaso.

Ang Index Crimes gikan sa modul-an sa 300 ka kaso sa maong termino sa miaging tuig, karong tuiga sa mao gihapong termino, miabot og kapin sa 600.

Kinsa bay provincial direktor sa Sugbo atol sa maong higayon? Kon wala ko masayop, panahon pa kini ni Koronel Drusillo Bolodo kay si Koronel Vic Loot bag-ohay pa man nga mibalik sa maong pwesto.

Di ba kaniadto nagsigi man ko og tuki nga hinay kaayo ang kapolisan sa probinsya sa paglusad og kampanya batok sa mga badlongon sa balaod?

Akong balikon, si Koronel Bolodo takus kaayo nga modumala sa probinsya tungod kay daku pa gani siya og ranggo kay kang Loot, apan tingali subra ra siya kabuotan.

Tungod niini, ang kapolisan sa probinsya atol sa iyang termino, nagpabaya lang sa ilang katungdanan og daw sa nagbinayot lang.

Gikuyawan sab ko nga kon si Koronel Loot maghinay-hinay sa iyang pagdumala sa Cebu provincial Police office, basin og mahisama ang iyang rekord sa nakuha ni Koronel Bolodo.

Akong balikon nga ya-ya kaayo ang atong kapolisan sa kalungsuran sa paghimo og mga preventive measures nga malikayan ang mga Index Crimes.

Gawas niana, ya-ya usab sila nga mohimo'g kampanya batok sa mga illegal nga kalihukan, sama sa paghimo'g kampanya batok sa mga illegal nga sugal.

Wala malilong kanako nga ang video karera ug masyaw diha sa kalungsuran, ilabi na sa amihanang Sugbo, naghitak na pagbalik.

Wala pa ko makadungog ni Koronel Loot nga mihimo og hugot nga kamandoan sa iyang mga sakop nga kampanyahan ang maong illegal nga kalihukan.