Modus sa terminal

Mga suki, wala ako malimot nga daghan na akog nasulat nga estilo sa modus operandi sa mga badlongon sa katilingban nga anha mopasalir sa ilang tinonto sa mga bus terminal. Apan ania pay laing estilo sa modus nga angay ninyong masayran maong ako kining gisulat karon.

Diha sa mga bus terminal, adunay mga mangunguot nga magpakaaron-ingnon nga usa ka dispatser nga manganbas og pasahero. Inig-abot sa pasahero sa terminal, mosugat kaniya ang daghang dispatser ug mangutana mahitungod sa iyang destination. Ang suspek nga mangunguot monunot usab sa mga dispatser sa pagduol sa iyang prospek nga biktimahon.

Samtang gipunsisokan sa mga dispatser ang pasahero, ang mangunguot nagpahigayon na sa pag-abli sa bag sa prospek o ba kaha sa pagkuot sa bolsa sa karsones aron pagkuha sa wallet. Kutob sa makuotan dad-on gayod sa suspek. Inigsakay sa biktima sa bus, hayan mao pa siya makaamgo nga nawagtang na ang iyang kuwarta ug uban pang valuables.

Dili man god makamatikod ang pasahero nga gikuotan og giablihan na ang iyang bag samtang gipunsisokan siya sa mga dispatser. Mao nga makahigayon gayod ang suspek sa pagtuman sa daotan niyang katuyoan. Pagbantay kamo niini.

* * *

Sa laing bahin, padayon kong nakadawat og reklamo gikan sa mga cellphone subscribers ug wala ko masayod kon kanus-a pa kini mahunong. Ang duha sa mga text nga akong nadawat atong hatagan og pagtagad karon.

0927-6438076: "Maayong adlaw, Sir. Duna koy reklamo aning 2346. Wa ako magsubscribe pero sige man og padala og logo ug ringtone. Bisan moingon ko nga NO, mopadala gihapon. Usik kaayo ang akong load kay makuhaan man. Binuang man ning ila." (Sent: October 21, 2005---14:41:03)

0928-2673058: "Good day. Nabasa nako ang reklamo bahin sa Smart. Bisan motext ta og Stop sending promo, di magsilbi. Mobawos lang dayon: You will never receive info message. Pero next day magpadala na pod." (Sent: October 21, 2005-14:37:58)

Daghan na gyod mong mireklamo mahitungod niini. Pero wala pa koy ideya hangtod karon kon mahunong na ba kining misteryosong pagkahanaw sa inyong mga load.Manghinaot lamang kita nga patalinghogan na sa mga network provider kining inyong mga yangungo.

* * *

Sumbong ug reklamo? Text sa 0910-8105522)