EDITORYAL - Ang mga taytayan dakog papel sa komersyo

Ang milabay'ng eksperimento sa Metro Cebu Bridge Management Board pagpatuman sa "one way traffic scheme" sa First Mactan Bridge naghatag og daghang leksyon sa tanan.

Bisan negatibo o positibong leksyon angayang himoan sa mga hingtungdan og kasulbaran ingon man kausaban aron makahatag pa og mas maayong serbisyo ngadto sa mga Sugbuanon.

Daghang mitumaw nga mga sugyot gikan sa mga nagkadaiyang sektor ug lokal nga mga opisyal dili lang sa Lapu-Lapu City ug Mandaue City, bisan na si Mayor Tomas Osmeña sa dakbayan sa Sugbo dunay gikapaambit nga suhestiyon ug duna say disgusto sa mga sugyot sa uban.

Bisag unsa pay mga reaksyon ug suhestiyon sa mga opisyales sa maong eksperimento angayang ilang hinumduman nga ang mga taytayan nga nagkonektar sa Mactan ug mainland Cebu dakog papel sa dagan sa komersyo sa lalawigan.

Bisan unsang solusyon nga mahuna-hunaan sa mga hingtungdan angayang mokomporme sa kinabag-an, kini maglakip na sa planong pagtukod og laing taytayan, pagbutang og mas daghang ferry terminals nga magtabok-tabok sa duha ka isla, pagpalapad sa mga kalsada ug uban pa.