Kompyansa ra kaayo

Tambag nako sa mga gwardya sa bangko. Rekisaha gihapon ninyo ang mga tawo nga mosulod sa bangko bisan og sila modeposito pa og armas kaninyo.

Mahimo nga ang maong mga tawo nga modeposito kaninyo og armas mga tulisan, og duha ang ilang armas.

Nabantayan man god nako nga daghang mga gwardya sa bangko nga akong nasudlan nga subra kaayo kakompyansa.

Kon dunay tawo nga modeposito kanila og armas, dili na lang nila rekisahon pa. Unsay mahitabo kon ang maong mga tawo, mga tulisan nga nagdala sila og duha ka armas? Mahimong ang usa nila ka armas ilang gideposito aron kamo mokompyansa.

Sigurado nga mokompyansa ang mga gwardya kay magtoo man sila nga wala nay armas ang tawo nga modeposito kanila sa ilang hinagiban. Apan kon duha ang ilang armas, may nahabilin pa nga usa nga magamit sa pagpanulis.

Gibalik-balik na nako sa pagpasabot - kaniadto pa - nga daghang mga gwardya nga kompyansa kaayo. Kuyog nako ang akong higala nga dunay armas.

Misulod mi sa Philippine National Bank diha sa Magallanes. Taud-taud na kini nga nahitabo apan dili ko makalimot.

Pagsulod namo, gibilin sa akong amigo ang iyang clutch bag og giingnan ang gwardya nga armas ang sulod niini. Mao to nga misulod mi nga wala na lang rekisaha sa gwardya nga nagbantay sa entrance sa bangko.

Apan ang tinuod, hand held radio ra maoy sulod sa bag nga gideposito sa akong kauban didto sa gwardya. Sa laktud, nakasulod ang akong kauban sa bangko nga nagluklok gihapon og armas nga daw sa dili makit-an.

Nag-insert pa sa iyang polo long sleeve. Kon kuwang ka og training, dili ka maantigo motago og armas nga magsul-ob og long sleeve unya mag-insert. Apan kadtong nakaagi og intelligence training, bansay kaayo ani.

Dili lang nako itug-an ang pamaagi kay tabla ra og gitudloan nato ang mga kriminal elements aron matabangan sila sa ilang dautang buhat.

* * *

Kadtong gwardya nga nadistino sa ASPAC Bank didto sa Tabogon, nakalapas sa tukmang lagda og angay siya nga silotan.

Kon ako'y pagbut-on, angay siya nga langkatan sa lisensya sa pagka gwardya. Abi ninyo og ngano? Wala niya tumana ang Number 5 sa 11 General Order.

Nalimot na ba kamo sa inyong military training? Sa Pre-Licensing Training for Security Guards, gitudlo usab ang mga lagda sa 11 General Order. Ang kamandoan mao nga dili gayod pabiyaan ang pwesto.

Kay si Larry Nuñeza, sa ROPISA Security Agency mao ra may gwardya sa maong bangko, dili unta siya mobiya didto.

Gibiyaan man ni Nuñeza ang bangko kay nagkuha siya og pagkaon didto sa gipuy-an niya nga panimalay. Bisan og ang balay nga gikuhaan niya'g pagkaon nahimutang duol ra sa bangko, apan dili unta kadto angay niya nga himoon.

* * *

Daygon nako ang kapolisan sa lungsod sa San Remigio, nga gipangulohan ni Chief Inspector Laurel Almirante kay tungod sa ilang kaabtik, nadakpan ra dayon nila ang duha sa lima ka suspetsadong tulisan sa bangko.

Nag-checkpoint man dayon ang kapolisan sa San Remigio. Pag-agi sa asul nga kotse nga gisakyan sa duha ka suspetsadong tulisan, aw tiklo dayon. Pangutana, nganong wala man sila ma-checkpoint sa kapolisan sa Bogo?

Buyno, kamo maoy akong hatagan og higayon nga motubag kon ngano nga ang kapolisan sa Bogo wala man makadakop nga anha man g'yod unta moagi sa eskena paingon sa Pamintao ang tanang sakyanan nga mopaingon sa San Remigio.