Umabot na sa aming kaalaman ang kakaibang MODUS ng grupong ito ni JOTA kung saan ginagamit ang pina-XEROX na kopya ng kolum na ito ng ‘‘Imbestigasyon ng BAHALA SI TULFO’’ at ipinamumudmod sa kanilang mga kinokotongan.
Ayon sa aming pinaganang mga BITAG undercover, sinusubaybayan daw ng grupo ni JOTA ang kolum na ito. At kapag tungkol daw sa mga ilegal na pasugalan ang aming inuupakan. Dito nagpi-piyesta ang angkan nitong kawatan na si JOTA.
Dala ang naturang xerox copy ng kolulm na ’to, iniikot ng grupo ni JOTA ang lahat ng mga illegal na pasugalan sa kamaynilaan. Hindi rin daw pinatatawad ng grupong ito maging mga liblib na lalawigan.
Nu’ng nakaraang Lunes at Miyerkules, a-Siete at a-Nuebe ng Nobyembre 2005, isinulat ko sa kolum na ito ang MODUS ng isa pang grupo na nagpapakilalang BITAG kuno. Isang SPO2 NORIE LORIEGA o ARIS NORIEGA naman ang sangkot dito.
Raket ng grupo ni Noriega o Loriega ang magpakilalang kolektor daw ng BITAG. Kinukolektahan ng mga ito ang kanilang mga kabalahibong ‘‘operator’’ at ‘‘maintainer’’ ng mga illegal na pasugalan. Buwanan ang tinatanggap na ‘‘intelihensiya’’ ng mga hinayupak.
At dahil sa aming naisulat nu’ng nakaraang Lunes at Miyerkules, naging malikhain ang ‘‘utak-kalabaw’’ na si JOTA. Ipinamudmod sa mga may-ari ng mga illegal na peryahan at pasugalan.
Pinangalandakan daw ng hunghang, siya raw ang nasa likod ng nabanggit na kolum. Ginawang panakot upang tuloy ang kanyang MODUS sa pangongotong.
Mensahe ng kolum na ito at ng BITAG, partikular sa mga ka-tribu ni JOTA, ‘‘h’wag na ninyong tangkaing makipagsubukan sa aming grupo. Dahil sa susunod, hindi na kami mag-aatubiling BALATAN kayo ng inyong mababantot na pagkatao!’’
Kapag nalaman ng aming pinakalat na ‘‘undercover,’’ muli ninyong kinakaladkad ang BITAG. Itaga ninyo sa bato, kami ang magsisilbing ‘‘berdugo’’ at tutuldok sa inyong mga katarantaduhan!