Ang ulahi niini mao ang pagtulis sa usa ka branch sa Western Union Money Transfer didto sa uptown area nga duol lamang sa Fuente Police Station.
Miani og mga pagbatikos ang kapolisan tungod sa giingong ilang hinay nga aksiyon batok sa mga suspetsado, kinsa giingong mga sakop sa gikaintapang Rey Torres-Danny Limotan Robbery Group.
Ug sa laing bahin, padayon ang pagpatay sa giingong mga bugok sa katilingban dinhi sa dakbayan sa gidudaha'ng mga vigilante. Sa labing ulahing talaan, moabot na kuno sa 103 ang mga nabiktima sa mga vigilante sukad sila nagsugod pag-operate sa dakbayan kaniadtong Disyembre sa niaging tuig.
Apan daghan ang miingon nga wala gihapon magsilbi ang operasyon sa mga vigilante tungod kay sige gihapon ang mga pagpanulis sa dakbayan. Gani, mora'g gibaliwala lamang sa mga tulisan kining giingong mga vigilante killing tungod kay wala g'yud sila mibahar sa ilang operasyon.
Kon atong subayon, nakatabang ba g'yud ang mga vigilante pagmintenar sa kahusay ug kalinaw dinhi sa dakbayan? Sa akong tan-aw wala. Kini gumikan kay padayon gihapong mikuyanap ang nagkalainlaing krimen dinhi sa dakbayan.
Gani daghan ang miingon nga nagkabangis na hinuon ang mga tulisan. Ug pruweba niini mao ang ilang walay pagpanuko pagtulis sa Western Union Money Transfer branch didto sa Fuente Osmeña nga duol lamang sa estasyonan sa kapolisan ug sa usa ka cell phone shop sa Gorordo Avenue nga duol na mismo sa Cebu City Police Office.
Bitaw, nagdala og dakong tanghaga kon ngano nga ang pagpangatake sa mga vigilante wala man nakapahadlok sa mga tulisan. Nagpasabot ba kini nga wala malisang ang mga tulisan sa operasyon sa mga vigilante nga daghan na ang gitipi?
Kon mao kini, ang pagpakatap og mga vigilante dili diay maoy sulbad sa nagsakang kriminalidad dinhi sa dakbayan. Kini tungod kay wala ko makadungog og mga banggiitang tulisan nga ilang gibirahan, ug atong nakita nga ang ilang mga biktima kadto lamang nalambigit sa mga gagmay'ng krimen.
Hinuon, ang operasyon sa mga vigilante dinhi naghatag og usa ka negatibong impresyon sa katawhan nga dili diay kaya sa otoridad ug lokal nga pangagamhanan ang pag-kontrolar sa hilabihan ka kuyanap nga kriminalidad sa dakbayan.
Ug nahadlok ko nga usa unya kini sa mga hinungdan ngano nga moyam-id kanato ang mga magpapatigayon ug turista pagduaw sa siyudad. Basin unya nga kon padayon kining mga misteryosong pagpatay, wala nay mosalig sa katakos sa otoridad pagmintenar sa kahusay ug kalinaw sa Sugbo nga giisip nga labing progresibong dakbayan sa nasud gawas sa Metro Manila.
Insakto lamang ang mga panawagan pag-imbestigar sa mga sunodsunod nga pagpatay sa giingong mga vigilante. Kay kon magpadayon kini, walay laing mabasol niining nagkamaot nga imahe sa dakbayan kondili mismo ang mga namunoan ug otoridad.
Sa ako nang gikaingon, dili sulbad sa pagkuyanap sa mga krimen sa dakbayan ang operasyon sa gituohan mga sakop sa vigilante. Hinuon, kining mga pagpatay naghatag og mantsa sa maayong reputasyon sa dakbayan isip usa sa nag-unang siyudad sa nasud.