Huwag cotton buds ang gamitin sa taynga

MADALAS na sa pagsu-swimming o maging sa kinagawiang paliligo ay napapasukan ng tubig ang taynga. Mahapdi, makati at masarap kalikutin ang taynga dahil may foreign body na nakapasok sa ear canal na madalas na simulan ng impeksiyon. Dahil ang tubig ay na-trapped sa ear canal kaya unti-unti nitong pinarurupok at winawarat ang skin lining ng taynga na isang ideal breeding ground ng bacteria. Ang mga kabatirang ito ay mula sa international hearing aid specialist na si Dr. Eduardo Go.

Ayon kay Dr. Go para maiwasan ang tinatawag na swimmer’s ear dapat na matapos lumangoy ay alugin o igalaw-galaw ang ulo para matanggal ang tubig na nakapasok sa taynga. Marahang patuyuin ang external ear ng malinis na tela o tuwalya at huwag saksakan ng cotton buds o anumang bagay para patuyuin ang bukana at lagusan ng taynga dahil maaaring ito’y makasugat at matanggal ang tinatawag na protective earwax at ito ang pagsisimulan ng infection.

Ipinapayo ni Dr. Go na kapag hindi matanggal ang bumabarang tubig makabubuting komunsulta na sa doktor.