Traffic enforcer miabuso

Kita gani ang gitugyanan sa pagpatuman sa balaod, kita mismo motuman g'yod sa mga gilatid nga lagda aron walay makasaway.

Ang dakbayan sa Sugbo adunay ordinansa nga naglatid nga ang mga magsakay og motorsiklo kinahanglang magsul-ob gayod og crash helmet.

Ang mga sakop sa Citom - ang mga Citom enforcers ug ang mga traffic police dinhi sa dakbayan - maoy gitugyanan sa pagpatuman niining maong ordinansa.

Law-ay kaayo kon kita nga mga tigpatuman niining maong ordinansa mao ra usab ang dili motuman.

Kinsa ba kining traffic enforcer nga magsakay og motor, usa ka red Honda-70 nga ang plate numbers GL-9059.

Awhagon nako si Arnel Tancinco, ang executive director sa Citom, nga imong tawgon ang atensyon niining maong traffic enforcer Mr. Tancinco kay mauwaw ta og magdaghan ang ingon niini nga enforcer.

Nasundan nako kining maong enforcer didto sa dalan Imus mga alas 11:30 kagahapon. Nagsakay siya sa iyang red Honda-70 apan wala magsul-ob og helmet.

Wala usab siya'y dala nga helmet diha sa iyang motorsiklo. Miliko siya paingon sa Day-as barangay hall og miparking.

Ayaw usba ang imong pagsupak sa ordinansa Bay, ngil-ad tan-awon nga ikaw ang gitugyanan sa pagpanakop apan dili ka motuman sa lagda.

Basaha ra god ang ordinansa nga naglatid nga kinahanglang magsul-ob gayod og crash helmet ang mga magsakay og motor kon duna bay "exemption" sa mga Citom enforcers.

Kon gusto ka nga mohatag sa imong tubag, pangitaa lang ko sa opisina. Andam kong maminaw sa imong tubag kon ngano nga wala ka magsul-ob og crash helmet.

Gamay ra kining maong isyu, apan ang akong buot ipasabot mao nga motuman gayod kita sa balaod. Ako, panahon nga mag-drive ko'g motor, nabatasan na nako nga magsul-ob gayod og helmet.

Dili usab ko molapas sa mga lagda sa tukmang pagmaneho kay girespitohan nako ang balaod. Mao na nga masuko g'yod ko panahon nga akong makita nga dili ninyo ipatuman ang balaod.

* * *

Maayo tingali nga molihok na ang Integrated Bar of the Philippines pinaagi sa pagpasaka og kaso niadtong mga opisyal sa barangay nga magpataka og labay sa mga basura.

Mibalik na man usab ang pagpataka og labay sa mga basura sa lainlaing dapit nga wala matagad sa mga opisyal.

Niadtong Martes sa gabii, nakita nako ang daghang mga basura nga nagliundok sa aseras sa dalan Magallanes, atbang sa J King building. Usa ka basurero ang nagsigi og pangutingkay.

Labayanan ba god og mga basura ang maong dapit? Unsa may tukmang lagda sa paglabay sa mga basura?

Kay pirmi na man kining gihimo sa mga tag-iya og balay-patigayon diha, nganong nagkyogpos ra man ang opisyal sa barangay nga adunay hurisdiksyon sa maong dapit?

Lihoka na ninyo. Dakpa kining mga tawo nga magsigi og labay sa ilang mga basura diha sa maong dapit. Maayo man ganing iapil sa pagdakop kining mga tawo nga magsigi og pangukay sa mga basura nga mao na hinoon ang mokay-ag sa mga sagbot.