EDITORYAL - Nganong dili man molukat og permit?

Ang Batas Pambansa 880 maoy gibasehan sa Malacañang sa pagpatuman sa "no permit no rally policy."

Wala pa kini ma-repeal. Wala usab kini madeklarar nga inbalido sa bisan usa lang ka desisyon sa Korte Suprema.

Sa laktod, ang BP 880 nga maoy gihimong hinagiban sa Palasyo pagpatuman sa 'calibrated preemptive response' batok sa mga rally ug protesta sa kadalanan, nagpabiling balido ug angay ipatuman.

Katungod na sa gobiyerno ang pagsilot sa mosupak sa maong balaod.

Dili man tingale sila pasiritan og tubig sa bombero ug kulatahon nianang mga polis ug militar nga gipabantay batok sa mga demonstrasyon kun nakalukat pa sila og permit sa lokal nga kagamhanan, subay sa mando sa balaod.

Ang makauuwaw pa gyud, ang kanhi bise presidente nga si Teofisto Guingona, Senador Jamby Madrigal, ug tulo ka obispo sa Romano Katoliko nga simbahan miapil pa gyud sa demonstrasyon bisan nasayod silang wala kini permit.

Ngano man gyud nga kining mga militanteng pundok dili man lang molukat og permit?