Kompiyansa ra kaayo

EDITORYAL - Ang labing ulahing pagpangatake sa mga rebeldeng komunista sa usa ka detachment sa Barangay Sumon, Tuburan nga napatyan og tulo ka sundalo nagpakita sa kahaguka sa mga tropa sa gobyerno, bisan sa nagkataas nga tensiyon tali sa kagamhanan sa Pilipinas ug sa National Democratic Front.

Unom ka sundalo lamang ang gibutang sa maong detachment, bisan nasayod ang kasundalohan nga may mga advisory nga dili angay mokompiyansa ang kagamhanan karon batok sa mga pagpangatake sa rebeldeng New Peoples Army (NPA).

Si Koronel Jeffrey Omandam nagkanayon nga ang presensiya sa mga sundalo sa maong baryo tungod sa ilang community outreach program pagtabang sa mga residente sa maong lugar, ug nga kadtong unom ka sundalo pulos mga "non-combatants."

Ang pagka-"non-combatants" niadtong unom, apil na kadtong tulo nga napatay atol sa pagronda sa mga rebelde, dili makapugong sa mga rebelde pag-atake sa detachment. Sa laktod, angayang mangandam sa kanunay ang mga sundalo ug wad-on ang kompiyansa sa tanang oras.

Ang malampusong pagronda sa mga rebelde, diin nadagit nila ang upat ka M-16 armalite ug upat ka M-14 nga riple, leksiyon na sa kasundalohan dinhi.

Walay kumo sa pagbantay sa kanunay, dili ba?