Daghan nang mga political figures nga nanggawas ug gipasanginlan sa Malacañang nga maoy mga utok sa destabilization plan batok ni Presidente Arroyo. Ang labing makaluluoy karon mao sila si Senate President Franklin Drilon ug kanhi Presidente Cory Aquino.
Dili hinuon makamahay si Drilon ug Aquino nga maoy natingban sa mga pamasangil nga nagplanong ipapatay si Arroyo. Silang duha maoy labing impluwensiyadong mga tawo nga nanawagan sa pagpa-resign ni Arroyo niadtong milabay'ng mga bulan human angkuna niini nga siya kadtong babaye sa Hello Garci tape.
Pero dili sa tanang higayon nga tuohan nato ang nanggawas nga estorya. Bisan katuohan ang migawas nga estorya nga may interes sila sa gobyerno (kay si Drilon gustong mag-bise presidente kun si Noli de Castro mopuli sa puwesto ni Arroyo ug si Aquino na-pressure tungod sa anomaliya sa yuta sa mga Cojuangco sa Hacienda Luisita), apan dili sa tanang higayon katuohan ang estoryang tataw'ng gipatuyok gikan sa Malacañang.
Si Senador Miriam Defensor-Santiago maoy sabaan kaayong si Drilon maoy nagpaluyo sa assassination plot batok ni Arroyo.
Migawas ang mga hungihong nga iyang bana nga si Jun Santiago interesado diay'ng mag-commissioner sa Bureau of Customs.
Ang nakadaot gud dinhi sa Pilipinas, basta lang makapuwesto, bahala na kita og magkagubot!
Unang ngalan nga mabasahan sa criminal complaint nga gisang-at ni Jao sa Office of the Ombudsman - Visayas ang kang Supt. Oscar Catalan, ang hepe sa CIDG-7.
Makadadayeg kining gihimo ni Jao. Kay sulod sa pipila ka bulan niyang pagpakahilom, giakusahan siyang nakig-areglo sa CIDG-7.
Karon nga anaa na sa mga kamot sa Ombudsman ang kaso, maayong mangandam na lang sa ilang depensa ang CIDG-7. Unsaon ta man, batakang katungod sa pagka-tawo ni Jao ang nalapas ninyo sa dihang inyong gironda ang iyang yarda, dala ang depektosong search warrant.
Ang nakadaot pa gyud, inyong gi-imbitahan si Jao aron maka-esplikar sa iyang pagtiner sa giingong right-hand drive nga kotse, gideretso man hinuon ninyo siya og priso, naigo hinuon kamo sa arbitrary detention.
Nasayod si Gako nga aduna nay pipila ka rulings sa Korte Suprema nga nagkanayong dili makapanghilabot ang korte sa mga kaso kang kansang hurisdiksiyon iya sa Bureau of Customs, sumala sa nalatid sa Tariff and Customs Code of the Philippines.
Sa kaso ni Jao, naglambigit kini og imported nga sakyanan. Busa, walay korte nga maka-isyu og warrant aron sakmiton kanang imported nga sakyanan.
Kun makahupot na sa hurisdiksiyon sa imported nga butang tungod sa pag-isyu og warrant, in good faith, kinahanglang itugyan kini sa customs.
Si Gako dali nga naka-quash sa warrant. Apan kanang iyang pag-quash sa warrant dili garantiya nga maka-eskapo siya sa administrative case nga ihaon ni Jao ngadto sa Korte Suprema.
Sa kaso sa usa ka huwes nga miisyu og Writ of Replevin sa butang nga ubos na sa kustodiya sa korte tungod kay butang kadtong kinawat, gisuspenso gihapon siya sa Korte Suprema, bisan iyang gilibkas ang writ.
Si Gako makaduha na gisuspenso tungod sa pag-interbener niini sa trabahong iya sa customs. Kun ihinayon ni Jao, ikatulo na gyud ni.