Labella Sir!

Akong gidayeg si Konsehal Edgardo Labella - ang usa sa mga utokan nga sakop sa konseho sa dakbayan sa Sugbo - tungod sa mga maayo niyang huna-huna nga gipaninguha niya nga mapatuman pinaagi sa ordinansa ug mga resolusyon.

Tungod niining mga subsob na kaayong pagpanulis - ilabi na sa mga bangko - giawhag ni Konsehal Labella ang kadagkoan sa Cebu Bankers Association nga magbutang gayod sila og mga close circuit video cameras sa ilang balay-patigayon.

Ang mga security specialists mibutyag nga ang pagbutang og mga video monitors diha sa mga bangko ug ubang dagkong balay-patigayon, makapalambo gayod sa surveillance purposes.

Ang pagbutang og mga surveillance cameras, dili gayod hinoon makapugong kon adunay manulis sa bangko, apan daku kini og ikatabang sa pagsulbad sa mga pagpanulis kay posible man nga makita ang dagway sa mga tulisan.

Tinuod ang nabantayan ni Konsehal Labella nga dili ang tanang bangko adunay surveillance camera nga nag-record sa mga footages nga iyang nakuha.

Maayo usab nga kon aduna nay video camera ang mga bangko, unya na kini pad-on kon molapas na sa usa ka buwan.

Kining maong sugyot ni Labella giduso niya sa city council secretariat kagahapon og gipaabot nga tukion kini sa mga konsehal atol sa ilang sesyon unya sa Miyerkules.

Kon maaprobahan ang maong awhag ni Labella, ang kopya niini ipadala ngadto ni Zosimo Lim, ang chairman sa committee on security sa Cebu Bankers Association.

Pastilan usab kining ubang tagdumala og mga bangko, magbutang lang og usa ka gwardya. Unya, ang gwardya pa g'yod nila gikan sa mga ahensya nga "wala mailhi" nga nagpasabot nga kuwang og "proper training."

Ang gipasabot nako nga "proper training" dili training sa pagka security guard, kanang pre-licensing training. Training kon unsay mga likayan og unsaon sa pagpugong nga walay armas nga makasulod sa bangko.

* * *

Dihay higayon nga misulod ko og bangko sa may Plaza Independencia. May nakauban ko nga polis. Ako kining gisabot nga huwaman nako ang iyang armas aron sukdon kon mabantayan ba ko nga nagdala og pusil.

Nag-una ko nga misulod sa bangko. Gikapkapan ko sa gwardya apan wala siya makabantay nga nagdala ko og armas. Ang polis nga nagsunod nako, mikatawa dihang mibalik ko og gihunghongan ang gwardya nga i-deposito nako ang armas.

Pastilan kining ubang gwardya, wala g'yoy kalibotan unsay angay nila nga himoon. Kadaku sa kalibre 45 nga pistola nga akong gidala, apan wala siya makabantay.

Pareho ra bitaw anang mga gwardya nga kunohay maghiling-hiling sa mga sakyanan ginamit ang samin sa matag sulod nimo sa mga parking area sa mga hotel, mall ug ubang dagkong tindahan. Pagka wala g'yoy pulos.

Maayo tingali konsehal Labella nga ilakip nimo unya sa pag-awhag nga ang mga gwardya sa bangko kinahanglan nga mopailawom og "refresher courses" matag tuig isip requirement sa pag-renew sa ilang lisensya.

* * *

Ugma, basin hisgotan nato ang kabahin sa mga Lupong Tagapamayapa, kay dunay nindot usab nga ordinansahon si Labella. Isip sakop ko sa Lupon sa usa ka barangay dinhi sa dakbayan, duna koy maayong sugyot kabahin niini.