EDITORYAL - Pakgangon ang mga abusadong PO1

Usa ka dakong opisyal sa usa ka dakong pribadong establisamento dinhi sa dakbayan sa Sugbo ang mipasupot niining pangutana ngari kanamo:

"Have you observed that most of the policemen involved in criminal acts are PO1s or police officers one, the lowest police rank?"

Naka-obserbar ba kuno kami nga kasagaran sa mga polis nga nalambigit sa krimen mga PO1 ang labing ubos nga ranggo sa kapolisan.

O, naka-obserbar kami. Hagbay ra ming naka-obserbar niini. Gani, amo naman kining nahisgutan sa usa sa mga editoryal namo pipila na ka buwan nga minglabay.

Uyon mi sa sugyot ning maong business executive (president and CEO sa ilang kompaniya) nga kining mga PO1 nga nalambigit sa mga pagpangabuso-- magpatakag pamusil, patakag panion, patakag pabuto, managpa og mga GRO, mangutong kun mangilkil, etc. -- dili hatagan og kahigayonan nga mosaka pa ang ilang ranggo.

"Ipaubos kini sa psychiatric test kun di man gani mahimo nga dismison dayon sa serbisyo," nagkanayon ang business exec.

"Kuyaw kining maong mga polisa. Abusado na man gani nga PO1 pa unsa pa kaha kun taas-taas na ang ranggo?" ang businessman mipuno.

Husto baya kining sugyot sa atong magbabasa. Kinahanglan pit-olan dayon kining mga abusadong PO1. Nip them in the bud, sa iningles pa.

Apan kadtong mga PO1 nga mipakitag maayong performance sa ilang pagpanerbisyo kinahanglan usab nga hatagan og recognition ang ilang maayong buhat.