Kalaswaan at ilegalidad hulog sa patibong ng BITAG!

Matapos masampulan ng BITAG nu’ng nakaraang linggo ang kababuyan at kalaswaan ng Remar Theater sa Cubao heto at may isa pang nahulog sa aming patibong ang Alta Theater.

Sa ilang araw na ginawang surveillance ng mga BITAG Undercovers, nahulog sa aming concealed camera ang kababuyan at kalaswaan ng mga parukyano nito sa loob mismo ng Alta Theater.

Hindi alintana ang init at baho sa loob ng sinehan at tuloy lang sa kanilang ginagawang kababuyan. Dahil hindi naman ang palabas sa sinehan ang kanilang dinadayo kundi ang kakaibang palabas sa mga kapwa parukyano.

Walang pinipiling lugar ang mga taong ito dahil maging sa mga pampublikong lugar tulad ng sinehan ay hindi nila pinalalampas.

Dahil dito isinagawa ang isang operasyon upang pasukin ang lungga ng kalaswaan kasama ang mga operatiba ng Criminal Investigation and Detection Group-Central Police District (CIDG-CPD) at ng BITAG. Huli sa akto ang ilang parukyano habang gumagawa ng kababuyan sa loob ng sinehan.

Matagumpay ding napasakamay ng pinagsanib na puwersa ng BITAG at ng Criminal Investigation and Detection Group-Western Police District (CIDG-WPD) ang kilalang "Paltik Queen" na si Ludy Nuñez.

Nabawi sa pag-iingat ni Nuñez ang ilang kalibre 38 paltik na pawang gawang Mindanao.

Karamihan sa kanyang mga parukyano ang mga notoryus na holdaper na bumibiktima sa mga pampasaherong jeepney partikular na sa Maynila.

Alam ng BITAG na hindi ito ang huling pagkakataon na may mahuhuli kaming mga malalaking tao sa likod ng sindikato ng pagtatago at pagbebenta ng mga ilegal na baril.

Hindi rin titigil ang BITAG sa pagtugis sa mga lungga ng kalaswaan hindi lamang sa Kamaynilaan, kundi maging ilang lugar sa probinsiya.

Sa pakikipag-ugnayan ng mga undercover ng bayan at ilang operatiba, tiyak na marami pa ang mahuhulog sa aming BITAG! Abangan ngayong Sabado ang kabuuan ng lahat ng ito.