Palisensya na!

Misamot kadaghan ang katawhan nga nagpanon paingon sa Firearms and Explosives Section diha sa Police Regional Office-7 gikan sa buntag hangtud na sa hapon.

Buot sila nga mopahimulos sa nagkaduol na lang nga deadline sa gitanyag nga amnesty ni Presidente Arroyo nga naghatag og higayon sa mga tawo naghupot og walay lisensya nga armas aron makapalisensya.

Sari-sari lang ang mga tawo nga miadto, dunay mga sakop sa media, mga polis, military, gwardya, mga opisyal sa kagamhanan ug mga yano nga sibilyan.

May nakit-an gani ko kagahapon didto nga usa ka iladong tawo sa usa ka government investigating agency nga nagpalisensya. Abi ninyo, tungod sa kadaghan sa buot magpalisensya, pirmi lang nahutdan sa application forms ang kapolisan.

Pagka karon, hapit na moabot og 3,000 ang nagpalisensya og lainlaing matang sa armas ubos sa amnesty nga gitanyag ni Presidente Arroyo.

Akong awhag niadtong mga hilig g'yod mohupot og armas nga magpalisensya g'yod sila. Ang P2,000 nga bayad sa pagpalisensya sa ilang armas, kataw-an ra unya kana sa abogado kon madakpan sila tungod sa illegal possession of firearms.

Akong balikon, sayon ra kaayo ang pagpalisensya og armas ubos sa amnesty nga gitanyag sa presidente. Ang papeles nga inyong ipresentar mao ra ang "proof of identity" ug ang "proof of address."

Mobalik na usab ko sa pagpasabot. Ang "proof of address" mao ang mga papeles sama sa billing sa koryente, telepono, cable TV, og suwat nga nag-agi sa post office.



Unya ang "proof of identity" mao ang mga papeles sama sa birth certificates, marriage certificates, passport ug uban pa.

Unya, lisud pa god na nga kuhaon? Kon naa na gani na, mobayad ka na adto sa bangko (Land Bank of the Philippines).

Bisan unsa nga matang sa mga mugbo nga armas, 45 nga pistola, 357 magnum revolver ug uban pa, P2,000 ang bayranan. Kadtong magpalisensya og "high powered automatic firearms, mahal-mahal og gamay, P3,000.

Aw, pagdala diay og upat ka 2 x 2 nga ID picture, ug upat ka orig nga bala kay gamiton kini sa pag-ballistics.

Ang inyong mga application para sa lisensya sa armas, maisip na nga "temporary license" kon mapirmahan nila ni Koronel Carmelo Valmoria ug Koronel Rey Lyndon Lawas.

Si Valmoria maoy assistant chief of staff for operations diha sa PRO-7, samtang si Lawas maoy hepe sa Firearms and Explosives Section.

Sige na! Hilig gani mo magdala-dala og armas, palisensya g'yod. Ako kon hilig pa ko, mag-una ko nga magpalisensya. Pero, bisan og daghan ang nasuko nako, magpabilin ko nga Ginoo ra ang saligan.

* * *

Karon diay'ng udto, mga pinili nga sakop sa media dalitan og makabuhong nga paniudto sa mga opisyal sa Visayan Electric Company (Veco) anha sa Casino Español de Cebu.

Usa kini sa paagi sa Veco nga mapakita nila ang ilang kamatinud-anon sa pakigsuod sa mga sakop sa media.

Garbo ko nga usa sa gipadad-an og imbitasyon. Hinuon pirmi man g'yod ko nila nga giimbitar matag duna sila'y kalihukan, sama sa pasko ug sa mga Press Freedom celebrations.

Kumusta diay ni Ethel Natera, ang press relations officer sa Veco, ug ang akong higala nga si Jiji Garcia, usa sa mga tag-iya sa Veco.

Sige, magkita-kita ta karong udto uban sa inyong mga makapakulba nga raffle. Nagkuha pa g'yod sila og banda nga magtukar samtang mangaon ang mga sakop sa media.