Magtipid sa tubig itong bayang sinta;
Kaya panawagan ng pitak sa madla
Ang ugaling ito ay gawin tuwina!
Pagka’t mahalaga sa lahat ng bagay —
Tayo ay magtipid sa tubig ng buhay;
Kahi’t pa sagana sa kanin at ulam
Kung wala ang tubig tayo’y mamamatay!
Magtipid ng tubig ay hindi masama
Kahi’t pa sabihing tayo ay sagana;
Sa panahong ito na tayo’y salanta
Magtipid ay isang gawang pambihira!
Noong araw tayo’y sagana sa tubig —
Ito’y likas-yamang bukal na malinis;
Magdukal ka lamang tubig ay pupuslit
Na sa ating lahat biyaya ng langit!
Pero nag-iba na ang takbo ng buhay
Ang saganang tubig ayaw nang bumukal;
Sa dami ng taong ngayo’y nabubuhay
Nakukuhang tubig karampot na lamang!
Ang sikat ng araw at ihip ng hangin
Tayo’y napapaso kapag dumarating;
Hindi tulad noon -— kung gabing madilim
Kay sarap ng weather -— tulog ay mahimbing!
Dahil sa ang tao’y lalong dumarami,
Tubig na malinis nagiging marumi;
Marami ng bansa sa tubig ay sawi
At ang "global warming" ay banta palagi!
Kaya nga ang dapat tayo ay magtipid
Sa tulo ng gripo kahi’t gagabinlid;
Bawa’t patak nito ay dugong malinis
Na sa ugat nati’y dadaloy na pilit!