Bigtime nga modus

Ang cyber sex maisip nga usa ka bigtime nga modus operandi sa mga badlongon sa katilingban. Sumala pa ni Senador Jamby Madrigal, matawag nga usa ka dakong negosyo ang cyber sex dinhi sa Pilipinas.

Midagsang na pag-ayo karong panahona ang cyber sex. Gibanabana nga mokabat usab sa P5 million ang gipagawas sa mga nagpaluyo niini aron idatong sa mga awtoridad aron dili sikopon kining maong matang sa negosyong illegal.

Gipadayag ni Senador Madrigal nga kon dili mohimog epektibong aksiyon ang mga awtoridad batok sa cyber sex, posible nga ang Pilipinas maoy mobarog isip numero uno sa child pornography sa umaabot nga mga adlaw.

"The Philippines is the second largest worldwide as producers of child pornography," nagkanayon si Madrigal, kinsa maoy naghikay sa usa ka balaod sa Senado nga nagtinguha nga pahamtangan sa silot nga kamatayon ang si bisan kinsa nga maghupot og child pornographic materials.

Gibutyag usab ni Madrigal nga adunay dakong sindikato nga nagpadagan og cyber sex sa Manila, Las Piñas ug sa Subic. Kasagaran sa gigamit niining maong sindikato sa cyber sex mao ang mga bata nga nag-edad pa lang og 13 anyos paubos.

Ang estilo niining maong pundok mao ang paghaylo sa mga bata og dakong kantidad. Dili nila tug-anan ang mga bata sa matuod nilang trabaho. Ayha pa masayod ang mga bata sa tinuod nilang trabaho kon nahasulod na sila sa cyber sex den. Mao nga ang mga ginikanan sa mga bata angay magbantay ug dili gayod mosugot kon adunay mga tawo nga mohaylo og dakong kantidad sa ilang anak alang sa trabaho nga walay klaro.

"We wanted a conviction now because no one has been convicted that is why they are so bold," midugang sa pagpamahayag si Madrigal.

Tinuod bitaw ang gibutyag ni Madrigal. Tungod kay wala pay usa nga nasilotan sa mga tawong nalambigit sa pagpadagan og cyber sex, mao kini ang hinungdan nga wala silay kukahadlok sa ilang operasyon. Ang naalaot mao ang mga bata nga sa linghod nilang pangedaron gipahimuslan aron makakuwarta ang mga tawo nga nagpaluyo niining maong dakong sistema sa modus operandi.

May mga report nga kaliboan na ka mga Pinoy ang nadagit sa cyber sex operators pinaagi lang sa internet. Aduna ganiy usa ka website nga may 212,257 ka potential online sexual partners nga pulos naggikan sa Pilipinas. Kini sa walay paghisgot sa uban pang mga website nga nagpasiugda og cyber sex.

Aduna nay pipila ka child offenders dinhi sa atong nasod nga nasikop, apil na kadtong usa ka Dutch national nga namatay niadtong miaging Mayo kay misukol sa mga awtoridad. Sa maong hitabo, nasuta nga may suki sa cyber sex nga mohatag og P50,000 kada buwan bugti sa pagpakita sa mga babaye sa cyber sex den sa bastos nga mga buhat diha sa internet.

* * *

(Sumbong ug reklamo? Text sa 0910-8105522)