Nganong tak-om?

Ang team leader sa Commission on Audit (COA) sa Cebu State College of Science and Technology (CSCST), Sonia L. Dejacto, ug ang iyang mga sakop gipasanginlang nagpabaya sa ilang trabaho. Maong napakyas ang COA pagbaraw sa gikuwestiyon nga pagdawat sa mga opisyal ug mga kawani sa CSCST og dagkong honorarium gikan sa mga klase nga giingong wa nila serbisyohi.

Nagduda pa gani ang presidente sa System Association of Faculty and Employees (SAFE) Cebu City Campus Chapter, si Dr. Godofredo A. Loremia, nga puwerteng tak-oma ang COA auditors tungod sa pabor nga ilang nadawat gikan sa kadagkoan sa CSCST pinaagi sa paghatag nila og teaching loads ug mga posisyon para sa ilang mga anak ug mga paryente.

* * *

Si Dejacto niangkon nga nanawat sila og part time teaching loads gikan sa kadagkoan sa CSCST pero gihimo ni nila human na sa oras nga tingtrabaho. Pero niinsistir siya nga legal ang ilang pagtudlo sa eskuylahan aron makakuha og dugang kita para sa nagtubo nga mga panginahanglan sa ilang mga pamilya.

Niangkon sab si Dejacto nga ang ilang mga anak ug mga paryente gipanghatagan og mga posisyon sa CSCST. Giklaro hinuon niya nga wa sila manghangyo nga hatagan og trabaho ang ilang mga kadugo. Gawas pa, nidugang siya, propesyonal ang ilang mga paryente ug qualified sa ilang mga puwesto. Gipasabot niya nga daghan pang ubang kawani sa CSCST nga mga anak sa mga ginikanan nga unang nagtrabaho sa eskuylahan.

* * *

Samtang gitugotan ang COA auditors pag-praktis sa ilang propesyon human sa office hours, salikwaot tan-awon nga silang Dejacto ug kaubanan nagdawat og suholan ug mga benepisyo gikan sa CSCST nga ilang gibantayan. May sukaranan ang pagduda ni Dr. Loremia: Peligrong magpangikog na silang Dejacto bugti sa mga pabor nga ilang nadawat.

Si Atty. Roy Ursal, ang regional director sa legal ug adjudication office sa COA 7, nisaad pagsusi sa bakikaw nga sitwasyon nilang Dejacto ug kaubanan. Niangkon si Ursal nga ngil-ad tinuong tan-awon nga nagdawat og suholan ug mga benepisyo ang mga auditors gikan sa ahensiya nga ilang gi-audit.

* * *

Si Loremia nangutana sa Department of Budget and Management legal bang pagamit sa Special Trust Fund pagbayad sa honoraria para sa mosunod nga mga opisyal ug mga kawani nga maoy labing dagkog nadawat isip lecturer ug teaching assistant sa mga klase nga gibuak-buak og 28 ka higayon: •Dr. Jose Sal Tan: P125,000; •Dr. Victor Villaganas: P107,000; •Dr. Rodolfo Burgos: P100,101; •Panfilo Ciriaco: P60,040; •Cecilia De Los Reyes: P52,500; •Corazon Soco: P45,100; •Hercules Allera: P44,600; •Cynthia Sy: P39,420; •Cecilio Baga: P38,750; ug •Teresita Rojas: P26,000.

* * *

Email: leo_lastimosa@abs-cbn.com