EDITORYAL - Unsaon pagwagtang sa fixers

Giwarningan sa Supreme Court ang publiko batok sa mga fixer nga nanginabuhi sa ilegal nga paagi diha sa pipila ka mga opisina sa gobyerno.

Dili ikalimud ug ikalalis nga anaay daghang fixers sa mga buhatan sa gobyerno bisan pa sa mga warning nga gihimo batok kanila.

Ang klarong hinungdan nganong dili gyud mawa kun mapapha kining maong mga fixer mao ang gitawag nga bureaucratic redtape nga hangtud ning panahona nahimo gihapong kabahin sa pamaagi sa pagpadagan sa atong mga government offices.

Kadtong mga magbubuhis kun taxpayer nga gisamokan sa mga bureaucratic procedure sa mga buhatan sa gobyerno anha na lamang modangop sa fixers diin sayon ra kaayo ang transaction ug dali pa mahuman.

Dili igsapayan sa ubang magbubuhis ang dakong bayad ngadto sa fixer basta lang wa silay sagubangon nga kahasol ug dili sila malangan sa ilang ubang mga bulohaton.

Nagtuo kami nga mawala o ba kaha ma-minimize kining mga fixer kon wagtangon ang grabeng redtape nga sa dugay'ng panahon maoy gireklamo sa daghang mga tawo nga mo-transact og business sa gobyerno.

Nagtuo usab kami nga kining redtape maoy hinungdan sa petty corruption sa pipila ka mga buhatan sa kagamhanan. Busa angay gayud kini nga paphaon.