Sugbuak bills depektuso

Ang matinud-anon ug makadani nga power-point presentation ni Governor Gwendolyn Garcia didto sa kaulohan atubangan sa mga impluwensiyadong miyembro sa committee on local government sa Kongreso milampus pagkombinsir sa chairman sa Technical Working Group nga gitahasan pagtuon sa tulo ka mga balaudnon nga nagtinguha pagbuak buak sa lalawigan sa Sugbo nga mopahigayon gyud og hearing dinhi sa Sugbo.

Human sa dul-an sa usa ka oras nga presentasyon gipasalig ni Gobernador Luis Villafuerte nga iyang dad-on ang TWG dinhi sa Sugbo bisan pa og way pagtugot gikan sa chairman sa mother committee nga gipangulohan ni kongresista Emilio Macias.

Maayo pa si Villafuerte kay nakasabot sa sentimento sa mga Sugboanon nga kinahanglang hatagan sila og higayon nga madungog ang ilang tingog sa maong mga balaudnon. Ambot si Macias nakasabot ba kaha o nagpakaaron ingnon nga wa makasabot tungod kay daw sa gahi man gihapon siya sa iyang baruganan nga di mohimo og hearing sa Sugbo.

Si Macias nakasaksi sa presentasyon didto sa kaulohan diin ang iyang mga kauban klaro nga nakasabot niini, apan siya labaw pa sa pating bungol. Naputos sa kantiaw sa iyang mga kauban si Macias sa dihang nagsugod na ang presentasyon ni Garcia hinungdan nga klarong daw sa gisilian ang iyang lubot nga wa makasabot sa iyang gibati.

Nagpunay ug barug sulod sa pansayan si Macias nga mura bag gibus-aw o di ba kaha nag LBM, human sa presentasyon giduol siya sa mga reporter aron pangutan-on bahin sa iyang nasaksihan apan ang aroganteng si Macias igo lang mitubag nga way makuha ang mga reporter gikan kaniya.

Nabulgar usab atol sa presentasyon sa gobernador nga wa pa diay masunod sa mga proponents sa maong mga balaudnon ang checklist nga gilatid sa rules and regulations sa Kongreso sa dili pa hatagan og pagtagad sa komitiba ang maong mga balaudnon.

Si kanhi gobernador Pablo Garcia maoy mibulgar nga gawas nga dakong kalapasan sa Article 9 sa implementing rules and regulations sa Local Government Code ang pagsang-at sa maong mga balaudnon tungod kay way petition gikan sa mga interesadong mga lungsod wala pa gyud masunod ang checklist sa requirements sama sa pagbookbind sa tanang mga dokumento nga magsuporta sa maong mga balaudnon.

Nunot niini usa ka motion ang giduso nila ni Kongresista Eduardo Gullas, Antonio Cuenco ug lakip na ni Ed Zialcita sa Parañaque kagahapon aron iuktaba sa komitiba ni Macias ang pagtagad sa maong mga balaudnon hangtud nga masunod niini ang mga requirements.

Di hinuon kinahanglan nga hunongon ang tinguha pagpahigayon og public hearing sa Sugbo tungod kay maisip lang kining preliminary sa pormal unya nga pagpadayon sa pagtuki sa tulo ka mga balaudnon.

* * *

E-mail: fplanguido@yahoo.com