Masyaw wala gyo'd tagda

Ang Court of Appeals dugay ra nga mideklarar nga constitutional ang pagkamugna sa city ordinance 1616 nga nagdili sa pag-imprinta, pagbaligya ingon man paghupot og mga tipsheets sa masyaw dinhi sa dakbayan sa Sugbo.

Tungod niini, si bise mayor Michael Rama nahibulong kon ngano nga wala may gihimo nga hugtanay'ng kampanya ang kapolisan dinhi sa dakbayan aron masumpo ang pagpanggama og mga tipsheets.

Klaro kaayo nga nagkyogpos lang ang mga polis. Isip chairman sa Police Coordinating and Advisory Council, pakisayran ni Rama ang kapolisan nga gipangulohan ni Koronel Melvin Gayotin kon ngano nga wala man sila'y kampanya sa masyaw.

Kon mahunong god ang pagpakatap aning mga tipsheets sa masyaw, sigurado nga matibhang-tibhangan ang pagkuyanap sa maong matang sa illegal nga sugal. Sa ako nang giingon, anugon lang ang kahago sa atong mga kongresista pagmugna og balaod.

Gimugna nila ang Republic Act 9287 nga nagpausbaw sa silot sa mga makonbikto sa kaso nga naglambigit og illegal numbers game, apan ang kapolisan nagkyogpos lang og wala manakop. Dili ba maisip nga gahago-hago lang ang mga magbabalaod?

Ang nindot mao nga dunganon ang paghimo og kampanya batok sa mga tawo nga tigpasiugda sa pagpamaligya og illegal nga drugas, illegal nga sugal sama sa masyaw, video karera, hantak, tigbakay ug mga card games.

Unsa kahay rason sa kapolisan nga gipasagdan man nila ang mga tig-imprinta og masyaw tipsheets? Ang imprintahanan og mga masyaw tipsheets diha sa dalan Sikatuna may gilay-on lang nga subra sa usa ka gatus ka metros gikan sa Parian Police Station.

Kon dili makahimo ang mga polis diha sa Parian Police Station, ang mga sakop sa Vice Control Section ug Cebu City police intelligence maoy atong awhagon nga mohimo og aksyon niining maong binuang.

Moingon ko nga binuang tungod kay ang mga tig-imprinta sa mga masyaw tipsheets nagpagamit sila sa mga tigpasiugda sa masyaw, pinaagi sa pag-imprinta sa mga buhat-buhat ra nga kombinasyon sa numero nga mao kuno ang midaug apan diay sila ra ang nagbuot.

Dili ba tinuod? Swerte lang kamo kay daghan pang mga tawo ang padayon ninyong nailad sa pagka karon. Mitoo gihapon sila nga ang midaug nga kombinasyon gikan gayod sa tinuoray'ng duwa sa jai-alai didto sa Manila.

Akong balikon,

walay duwa sa jai-alai nga gikuhaan og resulta sa masyaw. Ang ilang padag-on nga numero kadtong mga numero nga gagmay ra og pusta aron nga daku ang ilang maganansya.

Kon misiaw man ang sugal nga masyaw dinhi sa dakbayan, mas grabe ang sa kalungsuran nga wala gihapon tagda ni Koronel Drusillo Bolodo. Moingon ko nga wala tagda ni Koronel Bolodo ang maong problema kay anaa man kini gihapon.

Ayaw ko'g ingna Koronel Bolodo nga wala kay mga tigpaniid nga makahatag kanimo og inpormasyon. Kaniadto sa termino ni Koronel Vicente Loot, nahurot-hurot g'yod pagsakmit ang mga video karera ug napitol ang mga illegal nga sugal sa probinsya.

Kadtong mga police chief nga wala mohimo'g kampanya batok sa illegal nga sugal sa ilang dapit, gipaimbistigar ni Loot. Apan dihang gitangtang si Loot ug gipuli si Bolodo, daw sa nahulog sa linaw ug natunaw ang gipahigayong imbistigasyon.