Gitaak ni Jesus ang Cesarea Filipino nga teritoryo sa mga pagano. Gitukod kini ni Filipe agig pasidungog kang Ceasar Augustus, emperador sa Roma. Sa maong dapit nahimutang ang templo ni Pan, usa ka diosdios sa mga Griyego. Didto nangutana si Jesus sa iyang mga tinun-an mahitungod sa iyang kaugalingon. Ang unang mga tubag sa iyang pangutana kung kinsa Siya sa ilang pag-ila Niya, matawag natong pinasibo sa usa ka public opinion. (Siya si Juan nga Magbubunyag, Propeta Elias, Jeremias, og uban pang mga propeta). Ang ikaduhang tubag matawag natong: Personal Opinion diin si Simon ang miingon: "Ikaw ang anak sa Dios nga buhi!. "Agig tubag, si Jesus miingon kaniya: Ikaw si Pedro og ibabaw ning bato, tukoron ko ang akong simbahan nga bisan gani ang kamatayon, dili makabuntog niini." Ang personal nga tubag ni Pedro dili lang kay tubag-tubag lang, hinunoa, nagtangag kini og conviction. Nituo gyud si Pedro nga si Jesus (lit. manluluwas) mao ang Kristo. (Heb. Mesiyas, Gr. "Kristos") kon dinihogan. Dugang pa, ang gihimong pagsangon ni Jesus ngadto kang Pedro usa pud ka personal nga pagtahas. Kon nganong si Pedro pa ang gipili kana, wala kita masayod kay dili nato matugkad ang mga paagi sa Ginoo, matud pa sa Ikaduhang pagbasa. Hinuon, usa lamang ang tumong kon nganong gihimo sa atong Ginoo nga matukod ang simbahan pinaagi sa pagpangulo sa yanong mananagat nga si Pedro og kini mao ang kaluwasan. Maingon nga si Sebna nga tinugyanan sa palasyo gipalagpot gikan sa iyang katungdanan og gipulihan siya ni Eliakin (Lit. Akong Ginoo, mao ang akong mga Kaigsuonan) aron maluwas gikan sa kadaot ang katawhan sa Dios tungod sa pagka-espiya ni Sebna ngadto sa mga langyaw. Kay inay mangulo, siya naman hinuon ang nagpunay'g sugnod sa kagubot.
Matag usa nato dunay kinaugalingon nga pag-ila sa atong Ginoo. Alang nako, ang mga theological og mga Christological explanations dili gyud makahatag og definitive nga tubag sa basic nga pangutana sa atong Ginoo: "Kinsa man ko sa Imong kinabuhi?" Si Pedro nakahatag sa iyang tubag tungod kay siya nituo. Siya nituo tungod kay siya nakasinati kon kinsa og asa dapita makasulod sa iyang kinabuhi ang atong Ginoo. Sa atong bahin usab ingon nga mga Kristohanon, angay natong tutokan og pamalandongan kon gisinati una nato ang Ginoo una kita nisulti og nihatag og pamalandong mahitungod kaniya. Kinsa man ako? Sayon nga pangutana nga lisod tubagon...Agig panapos ato kunong pamalandongan ang mga mosunod nga tudling sa awit sa mga Heswita nga nag-ulohan: Hesus na aking Kapatid.
"Hesus na aking kapatid, sa bukid ika'y nagtatanim. At sa palengke rin naman, ika'y naghahanap-buhay. Ikaw poon makikilala, sa taong magpakumbaba."