Bonnet gang

Nakadungog na ba kamo niining gitawag og "Bonnet Gang"? Nahisgotan ko na usa niana ka higayon kining maong grupo sa mga badlongon sa katilingban dinhi niining maong lindog. Apan giusab nako paghisgot karon ang bahin sa Bonnet Gang human nako masayri ang lain pang estilo sa ilang modus operandi.

Alang sa kasayoran sa tanan, midagsang pag-ayo kining maong grupo sa mga badlongon didto sa kaulohan. Lainlain lang silag modus. Bisan daghan na kanila ang nadakpan apan wala gayod mapuo ang maong mga badlongon. Gituohan nga daghan kaayo kini sila ug mosibat sa kaprobinsiyahan sa higayon nga init na kaayo sila sa kapolisan sa kaulohan.

Usa sa ilang estilo mao ang pagpaniid kon kinsa kadtong mga pamilya nga adunay sakop sa banay nga nanarbaho sa gawas. Magpaila kini sila sa prospective victim nga mga kawani sa usa ka ahensiya nga naghimog survey mahitungod sa kahimtang sa katawhan. Lupig pa nila ang mga reporter kon maka-interview sa ilang biktimahonon. Hangtod nga ang biktimahonon makatug-an bisan sa labing confidential nga aspeto sa iyang kinabuhi ug pagka tawo.

Human nila masayri nga may sakop sa banay nga nagtrabaho sa langyaw'ng lapyahan ang maong pamilya ug ang petsa sa pagpadala og kuwarta, magplano na ang mga kanahan kon unsaon nila pagsulod ang balay sa maong pamilya panahon sa kagabhion. Sanglit ila na man kining gi-survey, dili na sila maglisod paghikay og plano sa pagsulod sa maong balay.

Mao nga usa ka gabii niana, makugang na lang ang tagbalay kon kalit lang may mosulod nga mga tawo nga magsul-ob og bonnet sa iyang panimalay. Modeklarar dayon og hold-ap ang mga suspek nga pulos armado. Ang tagbalay nga mobatig kahadlok, walay laing mahimo gawas sa paghatag sa gipangayo sa mga suspek.

Wala lamay kasayoran ang biktima nga ang mga tawo nga nag-bonnet nga misulod sa ilang balay mao kadtong mga tawong nagpaila nga kawani sa usa ka partikular nga ahensiya nga mi-interview kaniya. Maong suheto kaayo ang mga kanahan sa iyang pinuy-anan ug sa iyang kuwarta nga nadawat gikan sa miyembro sa pamilay nga atua sa abroad.

Pagbantay kamo niini.

* * *

(Sumbong ug reklamo? Text sa 0910-8105522. E-mail: modus_banat@ yahoo.com.)