Pag-study mo uy

Diay leksyon ngadto sa mga polis, barangay tanod ug ubang tigpatuman sa balaod nga angay gayod nga inyong tumanon ang mga lagda kon unsaon pagdakop ang usa ka masalaypon sa balaod ug kon kanus-a sila mahimong rekisahon aron dili mausik ra ang inyong kahago.

Usa ka dinakpan sa mga tanod diha sa barangay Ermita giabswelto sa hukmanan kaniadtong Martes tungod kay nasuta ni Regional Trial Court (RTC) judge Gabriel Ingles nga illegal ang iyang pagkasikop.

Sa ato pa, ang bisan unsa nga butang nga nakuha gikan sa dinakpan dili mahimong gamitong ebidensya batok kaniya.

Si Hermis Baclay suspetsado sa paglabni sa cellphone sa usa ka babaye kaniadtong gabii sa Pebrero 11, 2004.

Matud sa mga tanod nga alas dos sa hapon kaniadtong Pebrero 12, didto sila sa barangay hall sa Ermita ug dunay mipahibalo kanila nga si Baclay nasigpatan nga namalit og shabu sa Warwick-Barracks.

Tuod man, giadto nila ug gidakop ang suspetsado. Nakuhaan kini og cellphone ug usa ka paketeng shabu. Gidala kini sa police station ug miangkon nga siya ang naglabni sa cellphone sa biktima.

Ang mga tanod miingon nga gidakop nila ang suspetsado kay pagkakita niini kanila misuway kini pagdagan. Pagrekisa, nakuhaan og shabu.

* * *

Ang gihimo sa mga tanod mahulagway nga usa ka kalapasan sa balaod. Dihang gidakop si Baclay, wala siya makahimo og salaod. Sala ba diay kon modagan ka kon makakita og tanod? Dili maisip nga continuing crime ang snatching.

Unya, human kini illegal nga gidakop sa mga tanod si Baclay, gidala kini sa police station og girekisa.

Ang Rule 126, section 12 sa Rules of Courts nagkanayon. "A person lawfully arrested may be searched for dangerous weapons or anything which may be used as proof of the commission of an offense, without a search warrant."

Apan kinahanglan nga ang iyang pagkasikop valido. Ang pagdakop ni Baclay, gihimo pinasikad sa warrantless arrest.

Gitugot sa balaod nga mahimong dakpon ang usa ka tawo nga dili na kinahanglan pa ang warrant of arrest. Bisan ang mga sibilyan gitugotan makahimo sa pagdakop apan ubos niining mga lagda.

a.) When, in his presence, the person to be arrested has committed, is actually committing, or is attempting to commit an offense.

b.) When an offense has just been committed and he has probable cause to believe, based on personal knowledge of facts or circumstances that the person to be arrested has committed it.

c.) When the person to be arrested is a prisoner who has escaped from a penal establishment or place where he is serving final judgment or temporarily confined while his case is pending, or has escaped while being transferred from one confinement to another.

Sa laktud, matud sa mga "karaan" kon dili gani ayohon sa pagdispuga makita gayod ang sidsid sa kapalpakan ilabi na kon ang kaso moabot na sa hukmanan.