Masyaw giangkon na

Duna nay pipila ka hepe sa kapolisan sa kalungsuran nga miangkon nga nag-operate ang masyaw sa ilang dapit. Apan wala sila makahatag og tukmang tubag dihang gipangutana kon nganong wala man nila masumpo ang maong illegal nga kalihukan.

Kon kamo'y akong pangutan-on nga mga magbabasa ning akong lindog matag adlaw, unsang matanga kining maong mga hepe sa kapolisan?

Sa sinugdanan, ang maong mga hepe sa kapolisan misuway pagpanghimakak nga dunay nag-operate nga masyaw sa ilang dapit. Apan dihang sila nasayod nga usa sa reporter nga miinterview kanila taga amihanang Sugbo, ingon sa nauwaw og napugos pag-angkon.

Karon, ang ilang rason nausab. Misuporta na sila sa akong baruganan nga ingon sa may nagpahipi nga rason kon nganong wala sila molihok.

Abi ninyo og unsay ilang girason? Matud sa maong mga opisyal nga kon tinud-anay pa nga ang provincial police direktor mikampanya batok sa illegal nga sugal, gipalihok na unta niya ang mga sakop sa Cebu provincial intelligence section.

Wala g'yod masayop ang maong mga hepe sa kapolisan kay ang mga sakop sa provincial police intelligence section, wala gayod mohimo og hugtanay nga kampanya batok sa naghitak nga illegal nga sugal sa probinsya.

Sa ako nang gipasabot, lahi kaayo ang sitwasyon karon sa pagdumala ni Koronel Drusillo Bolodo kon itandi sa panahon ni Koronel Vicente Loot. Sa panahon ni Loot, ang mga illegal nga sugal, ilabi na ang video karera, gihugtan sa pagsakmit.

Apan karon sa termino ni Koronel Bolodo, gipasagdan lang ang maong mga illegal nga sugalan, masyaw ug video karera. Suheto kaayo ko kay lumad intawon ko nga taga probinsya.

Nganong wala man gayod masumpo sa kapolisan ang naghitak nga video karera ug masyaw sa amihanang Sugbo? Kanunay ko nga makadawat og report kabahin sa mga video karera nga nag-operate sa Bogo, Medellin, San Remigio ug ubang silingan nga lungsod.

Kon tinuoray pa nga kini si Koronel Bolodo mokampanya sa illegal nga mga sugal, iya dayong mandoan ang mga sakop sa provincial intelligence section ug ang hingtungdang police chief nga paspasan ang kampanya sa illegal nga sugal.

Unya, dili kay igo ra sa pagluwat og kamandoan. Kinahanglang tan-awon niya kon gituman ba sa iyang mga sakop ang kamandoan kay basin og gikumot lang kini dayong labay sa basura.

Pero, natan-aw nako nga mora'g bungol ug buta kini si Koronel Bolodo nga dili makadungog ug makabasa sa mga pagsaway kaniya.

Ambot, naunsa usab kini si Heneral Eduardo Gador nga nagpiyong-piyong ra man usab sa iyang mga mata og wala man makakita sa kakuwangan sa serbisyo sa usa niya ka provincial police director.

* * *

Daghan kaayong mangutana nako kabahin sa pagpalisensya sa armas pinaagi sa amnesty program nga matapos karong Septembre 30.

Ang nakadaut kay ari mangutana nako og ipaagi pa sa text message. Ayaw na lang ipaagi sa text kon gusto mo nga mangutana, tawaga na lang ko kay tubagon ko kamo. Mahutdan man sab ta sa "load" ana ug kapoy na kaayo pagtubag sa nagbalikbalik ra nga pangutana.