Tapolang protesta

Niang mga ebidensiya nga si Presidente Gloria Macapagal-Arroyo, sukwahi sa iyang pasalig nga motingob na sa iyang panahon pagduma sa nasud ug pagpatuman sa gikinahanglang mga kausaban, nisentro sa tanan niyang paningkamot ug nigamit sa tanang kahimanan sa gobyerno aron paghaw-as sa iyang kaugalingon gikan sa nitibugsok nga popularidad ug seryusong hulga sa pagkalagpot gikan sa puwesto:
• Ginamit ang nihit nang daan nga nasudnon ug lokal nga panudlanan, ang tanang alyadong mga politiko, gikan sa mga mayor ug mga gobernador ngadto sa labing ubos nga opisyal sa barangay, gitapok sa Malakanyang, sa luhong hotels sa Metro Manila ug sa ubang urban centers sa nasud sama sa Sugbo aron pagdeklarar sa ilang way kamatayong suporta para sa presidente;
• Bisan sa gideklarar nga kaandam ni Presidente Arroyo pag-atubang ug pagtubag sa mga pasangil batok niya pinaagi sa impeachment process, ang alyadong mga kongresista wa nay kukaikog nga nangamang sa ilang kaubanan nga nipakita nag tilimad-on nga mopirma sa impeachment complaint batok sa presidente;

* * *

• Way pupanaganang nipalihok sa iyang mga itoy ug mga torotot paglawgaw sa Garci tapes, apil nang (1) Edgar Ruado, ang nagpailang chief of staff ni Kongresista Iggy Arroyo, nga nipirma og affidavit pag-angkon nga siyay gika-istorya sa presidente sa telepono, (2) Ilocos Sur Governor Chavit Singson kinsa nikalit lag pakita sa "X" tapes sa giingong plano ni kanhi presidente Joseph Estrada pagpukan sa administrasyon ug pagpatay ni Presidente Arroyo, ug (3) binayrang mga sakop sa media ug text, phone ug Internet brigades nga nipabaha sa tradisyonal nga media ug cyberspace sa nangalisbong propaganda pagtabon sa pagpanikas sa presidente;
• Paghakot sa iyang mga loyalista sa Metro Manila, sa Sugbo ug ubang bahin sa nasud-nakatag-an mo, ginamit gihapon ang kuwarta sa gobyerno-aron pagmatuod nga mas daghan sila kay sa otro sang hinakot nga mga dumadapig sa politikanhong oposisyon sa Makati City; ug
• Pagamit sa militar ug kapolisan paghudlat sa mga grupong tinuorayng nagprotesta para sa dinalian niyang resignasyon, sama sa pagpaulbo nila og kanyon sa tubig ug bomba sa teargas para sa gatosan ka demonstrador sa Malakanyang sa Sugbo ug sa ilang pagtanggong sud sa pipila ka oras sa mga demonstrador gikan sa mga probinsiya sa Luzon.

* * *

Niang mga ebidensiya nga di hingpit ang determinasyon sa mga grupong niawhag sa resignasyon ni Presidente Arroyo:

• Wa sila magkahiusa kinsay moduma sa nasud kon mabakanteng katungdanan sa presidente;

• Ang tradisyonal nga mga politiko andam mosayaw sa Cha-Cha bisan magpabilin sa puwesto ang presidente; ug

• Ang mas ligdong untang grupo nilang kanhi presidente Corazon Aquino ug sa nang-resign nga mga sakop sa gabinete gustong mokanaog si Presidente Arroyo pero tapolan na silang moprotesta sa kadalanan.

* * *

Email: leo_lastimosa@abs-cbn.com