Cyber protest

Niadtong Biyernes, dihang katumbahon nang administrasyon ni Presidente Gloria Macapagal-Arroyo, gilusad ang signature campaign sa cyberspace pag-awhag sa presidente pag-resign. Ang GMA Resign Now! (http://www.gmaresignnow.com/) gisugdan ni Vicente Romano III, ang utok sa eLagda nga dakog natampo sa pagpalagpot ni kanhi presidente Joseph Estrada niadtong 2001. Sa akong pagsuwat ini, ang nakapirma sa petisyon sa gitawag ni Romano nga "moral majority" niabot nag dul-an sa 20,000.

Si Romano niawhag sab sa mga grupo sa pagtukod sa ilang signature stations ginamit ang kopya sa petisyon ug signature sheets nga ma-download gikan sa website. Salamat ni Romano, duna nay kapahungawan ang katawhan nga di maato sa pagpaminaw sa tradisyonal nga media sa ilang sentimento sa krisis nga nihakop karon sa nasud.

* * *

Gipatin-aw ni Romano ang sukaranan sa kampanya: "Naminaw mi sa tapes. Nibasa mi sa transcripts. Nagtoo ming ang pakigsulti ni Presidente Arroyo kang (kanhi Comelec Commissioner Virgilio) Garcillano labaw pa sa 'lapse in judgment.' Ug kay gitudlo man sa presidente si Garcillano sa Comelec bisan gikaintapan nga 'tikasan,' klarong giplano nang daan ang pagpanikas.

Mahimo tang modangop sa impeachment. Pero ang tandugong sitwasyon mahimong modasig sa pipila ka grupo pagsakmit sa gahom sa ilegal nga paagi. Ug tungod sa kahuyang na sa presidente, nagtoo ming wa na siyay katakos pagduma, labi na sa pag-usab sa nasud ngadto sa lig-ong Republika.

Ang bugtong mahimo ni Presidente Arroyo mao ang pag-resign karon dayon, aron mapatuman ang lagda sa succession sa konstitusyon. Pinaagi ini, mahimong maluwas pa niyang Republika. Kon nagtoo ka, sama namo, nga si Presidente Arroyo kinahanglang mo-resign karon dayon, kuyog sa moral majority."

* * *

Gitubag sang Romano ang pipila ka pangutana:

*Nganong di man mong kapasaylo sa presidente? Nanikas siya. Bisan unsa niya katakos, ug bisan unsa kataphaw ang mopuli niya, imoral ang pagtugot sa pagpabilin sa lider nga mahimong di maoy tinuod nga presidente;

*Nganong di man paatubangon ang presidente sa impeachment? Si Gloria ang sentro sa krisis. Kon mo-resign siya, mawad-an nag sukaranan ang mga protesta;

*Kasaligan bang mopuli niya? Si Noli de Castro. Kon mo-resign sab siya, si Franklin Drilon. Bisan kinsa nila makahunong sa mga protesta. Kon magpabilin si Gloria, dako ang kahigayonan sa kudeta o people power. Ug ang modaog maoy magpili kinsay sunod nga mangu sa nasud;

*Di kasaligan si de Castro. Unsa man diay imong gusto, ang junta o si Erap? Si Noli wa pay eskandalo, way koneksiyon sa oposisyon ug popular sa masa;

*Kon mopirma ko, makumbinser ba si Gloria pag-resign? Way garantiya. Pero igo nang mahibawo siya nga ang mayoriya sa katawhan di molingiw sa iyang binuang. Kon di siya mo-resign, mahimong ang mayoriya sa gabinete maoy makumbinser pagbakwi sa ilang suporta niya.

* * *

Email: [email protected]