EDITORYAL - Dalaygon nga bahad

Usa ka desisyon sa kapolisan nga angay'ng daygon ug suportahan mao ang pagdili niini sa mga bata sa pag-apil-apil sa mga politikanhong rally ug demonstrasyon.

Si Acting Cebu City Police Director Melvin Gayotin mibahad ngadtos mga organizer sa rally nga iyang ipadakop kadtong mga ginikanan nga mopa-apil sa rally sa ilang mga bata ug sang-atan ug kasong violation of The Child abuse law.

Among gipaluyohan kining desisyon ni Director Gayotin. Sa dugay nang panahon atong makita ang mga gagmay'ng bata gipaapil sa mga politikanhong rally diin sila padad-on pa gani og mga placard.

Ang maong mga bata gihimo lang mga itoy-itoy nga wa gani makasabot sa kawsa nga giralihan sa ilang mga ginikanan. Ug sa maong pag-apil nila sa rally mabutang sa dakong kakuyaw ang ilang kinabuhi kun simbako adunay mga lamok-lamok tali sa mga raliyista ug sa mga kaatbang niini.

Hinaut nga tinud-on ni Director Gayotin ang iyang bahad ug dili kay pang-media ra ang mao niyang gisulti.