Bomba sa Time

Kay wa man mopakitag interes si Presidente Gloria Macapagal-Arroyo ug ang Malakanyang pag-ila kinsay nag-wiretap sa ilang panagsulti ni kanhi Comelec Commissioner Virgilio Garcillano, bisan upat na ka semana human niulbo ang kontrobersiya, ug kay di man sab interesado ang Kongreso gawas ni Senador Rodolfo Biazon, ug kay otro man sang nilingiw ang media gawas sa Philippine Center for Investigative Journalism (PCIJ) ug Newsbreak, dakong baligho nga ang Time, ang labing dakong magasin sa Estados Unidos, maoy nakauna pag-detalye sa ruta sa tulo ka oras nga audio recording sa wa pa mapabati ngadto sa publiko.

Ang artikulo sa Time sinuwat nilang Anthony Spaeth sa Washington ug Nelly Sindayen sa Manila maoy labing unang detalyadong asoy sa "Gloriagate" nga nabasahan sa Amerikanhong mga opisyal ug katawhan. Naglakip ni sa pagsuway sa Malakanyang pag-cover-up sa eskandalo pinaagi sa pagpresentar og pekeng bersiyon uban ni Edgar Ruado, ang chief of staff ni Kongresista Iggy Arroyo, bayaw sa presidente, nga niinsistir nga siya si "Gary" nga maoy ka-istorya sa presidente.

* * *

Niang di na kaayo bag-o dinhi sa Pilipinas pero eksplosibo pa gihapong kasayuran gikan sa Time, labi na atubangan sa determinadong paningkamot ni Presidente Arroyo pagkuha sa padayong suporta ni US President George Bush:

Si T/Sgt. Vidal Doble sa Intelligence Services of the Armed Forces of the Philippines (ISAFP) maoy ni-wiretap sa cellular phone ni Garcillano sa mga buwan sa Mayo ug Hunyo sa niaging tuig isip kabahin sa iyang normal nga trabaho;

Gihatag ni Doble ang orihinal nga kopya sa recording ngadto sa drayber ug bodyguard ni Atty. Samuel Ong, kanhi deputy director sa National Bureau of Investigation (NBI), Mayo karong tuiga;

Nakadawat og duha ka audiotapes gikan sa wa niya mailhing tinubdan pinaagi sa koreyo niadto gihapong Mayo si kanhi senador Francisco Tatad;

Niadtong Mayo 15, gisumiter ni Tatad ang audiotapes ngadto sa iyang abogadong si Allan Paguia kinsa iya sang gipangayoan og tambag unsaon pagamit ang recording; ug

Si Paguia mao nay naghimo og 32 minutos nga CD version nga wa na maglakip sa iyang gihulagway nga pribadong mga istorya sa pribadong mga indibiduwal.

* * *

Nipadayag og pagduda ang Time sa motibo ni Doble paghatag sa orihinal nga kopya sa recording ngadto ni Ong. Tinuod ba siyang gibayran sa oposisyon? Dunay mas klarong tubag ang artikulo sa Newsbreak: Gibisto sa kadagkoan sa ISAFP ang recording human laslasi ni AFP Chief Efren Abu ang dagkong gahom sa ahensiya.

Laing mga pangutana: Diin man gikan ang kopya ni Senador Panfilo Lacson nga iyang gipada para sa authentication sa eksperto sa Australia? Naatol ba lang nga si Doble sakop ni Lacson niadto sa Presidential Anti-Organized Crime Task Force (PAOCTF)?

* * *

Email: [email protected]