Gonzalez ipa-disbar

Husto ang lakang sa mga abogado ni magpapatigayon Richard King nga dili sila gusto nga ang National Bureau of Investigation (NBI) maoy moimbistigar sa giingong anomaliya sa pagpagawas og mora'g pinalit nga hukom sa kaso nga pending sa Department of Justice.

Sila si abogado Julito Alvarez ug Agusto Macam nagduda nga dili kredible ang sangpotanan sa imbistigasyon unya sa NBI kabahin sa gitahas kanila nga imbistigasyon kay ang kaso naglambigit man og mga kawani ug opisyal sa DOJ.

Tiaw mo, apil mismo si DOJ Secretarty Raul Gonzalez gidudahan karon nga nalambigit sa binuang. Daku kining problema karon ni Gonzalez. Mas maayo sab nga makasuway siya kay estrikto kaayo kining tawhana.

Kana lang pakighinabian siya sa mga sakop sa media, dali kaayo nga masuko kon dunay mga kontrobersyal nga isyu og kusog kaayo nga manginsulto. Butang nga dili maayo sa usa ka opisyal nga sama kaniya.

Ang pangutana nga angay'ng tubagon ni Gonzalez, unsa man, ang DOJ labaw ba diay sa Supreme Court nga mahimo man niya nga usbon ang hukom sa labaw'ng hukmanan?

Ang Supreme Court nakapagawas na og hukom nga dunay igong basihanan nga ang kasong kidnapping or serious illegal detention nga gipasaka batok ni Roderick Go, sa iyang asawa nga si Grace Tan Go, ug mga kauban, angay'ng ipadayon paghusay sa korte.

Tukma usab ang lakang sa mga abogado ni King nga mohimo'g lakang nga posibleng maglakip sa pagpa-disbar ni Gonzalez. Ngano god tawon nga ang DOJ mousab man sa hukom sa Supreme Court.

Ang mga abogado sa pamilyang Go, sa makadaghang higayon miawhag nga usbon unta sa Supreme Court ang hukom sa Regional Trial Court pinaagi sa pagsang-at og petition for certiorari, apan gisalikway kini sa labaw'ng hukmanan.

Ingon niini ang hukom sa Supreme Court sa petition sa pamilyang Go kaniadtong Marso 30, 2005. "The Court resolved to DENY the motion, as no substantial arguments were raised to warrant a reconsideration thereof. This denial is FINAL."

* * *

Kon imong lingion pagbalik ang hitabo nga naglambigit niining maong kaso, pangilogan ka. Tiaw mo, giluglog ang liog sa biktima nga si James Go ug gisamad-samaran ang lainlaing parte sa iyang kalawasan.

Didto kini himoa sa rooftop sa usa ka building sa dalan Plaridel kaniadtong udto sa Hunyo 24, 2002. Ang magtiayong Roderick ug Grace Go maoy gitumbok nga naghimo sa krimen uban sa ilang driver ug bodyguard nga polis.

Sa laktod, ang magtiayong Go gipasanginlan nga misuway pagpatay ni James King tungod sa daku kaayong utang nga nagkantidad og kapin sa P130 milyones. Dili kita makaingon nga sad-an na ang magtiayong Go, apan kinahanglang husayon kini sa korte.

* * *

Pahibaw-on nako si higalang Jojo dela Victoria, ang market administrator sa dakbayan sa Sugbo nga ang mga illegal occupants sa gilimpyohan nimong luna diha sa kilid sa Taboan market, namalik na sab Jo.

Report kini sa akong informer diha sa dalan Tres de Abril. Ang akong cellphone diay - 0917-3836645.