Kaanugon sa isdang nangadugta

Mga 60 ka banyerang isdang tulingan nga nasakmit sa mga polis nga sakop sa Regional Mobile Group (RMG) ang nadugta ug gilabay na lamang balik ngadto sa dagat.

Ngao man ni? Usik kaayo ang isda.

Sumala sa taho nga midangat dinhi sa ato sa Banat News ang maong isda nasakmit sa RMG gikan sa pipila ka mga ilegal fishermen niadtong kaadlawon sa Hunyo 11 ning tuiga.

Imbes idonar ang maong 60 ka banyerang isda ngadto sa mga charitable institutions, nga mao untay reglamento, wala itugot ang maong donasyon kay matud pa sa kapolisan (RMG) ila kining himoon nga ebidensiya batok sa mga nadakpang mangingisda.

Wala ba masayod kining mga taga RMG nga ang isda bisan unsa ka lab-as mobaho ug madugta na sud sa 24 oras kun dili ibutang sa freezer?

So, mao gyuy nahitabo. Nangabaho ang isda nga himuon unta nga ebidensiya. Ug napugos na lang sa paglabay niini ang kapolisan balik sa dagat imbes nga unta makaon pa sa mga kuwang sa kaon tang kaigsuonan.