Marcos’ leadership held sway for a long time dahil ipinagkaloob niya ang basic services sa taumbayan. May price control. Hindi basta-basta nakapagtataas ng presyo ang mga kompanya ng petrolyo. May Oil Price Stabilization Fund. Isang pondo na nagbibigay ng subsidiya sa presyo ng petrolyo kapag tumaas ang presyo ng langis sa world market. Kapakanan ng taumbayan ang inuna ni Makoy. Hindi ko sinasabing tama ang ginawa ni Marcos. Puwedeng siya’y naging mandarambong. Pero ibinahagi niya ang kanyang "dinambong" para guminhawa ang buhay ng marami. Well provided ang pangangailangan ng tao.
Galit kay Marcos ang mga binansagan niyang "oligarchs". Yung mga mayayamang negosyante na pinatalsik upang makopo niya at ng kanyang mga alipores ang mga pangunahing negosyo sa bansa. Pero ang epekto’y para pa rin sa interes ng mga maliliit. Mura ang bilihin. Mura ang serbisyo. Kasi kontrolado ni Marcos ang takbo ng negosyo.
Ngayon, malaking isyu ang diumano’y pandaraya sa eleksyon ni Presidente Arroyo. Malaking isyu ang pagtanggap diumano ng kanyang mga kaanak ng suhol mula sa ilegal na larong jueteng. Nagpoprotesta na ang mga tao sa lansangan at hinihingi ang kanyang pagbibitiw sa puwesto.
Kung nakatikim man lang kahit katiting ng ginhawa ang taumbayan sa liderato ni Gloria, kesehodang nandaya siya. walang ano mang puwersa ng kanyang mga kalaban ang puwedeng magpatalsik sa kanya. Ang problema, inuna ni Gloria ang kapakanan ng mga mayayamang kompanya against the interest of the poor.
Ang halaga ng edukasyon ay mataas gayung bagsak ang kalidad. Presyo ng paninda’y sobra ang taas habang maliit ang kita ng manggagawa. Sapat na dahilan iyan para ang taumbayan ay sumuporta sa ano mang kilusan para siya patalsikin.