Tungkulin ng "Imbestigasyon ng BAHALA SI TULFO" ang ipaalam sa taumbayan ang tunay na isyu.
Kahapon ng umaga, nakapanayam ng aking co-anchor sa aking radio program sa DZME (9:00 to 10:00 am) ang medical specialist ng Department of Health (DOH). Nagbigay linaw ito sa panibagong kinatatakutang balita hinggil daw sa Bio-Chemical na posibleng gamit ng teroristang Jemaah Islamiyah (JI).
Sinabi ni Dr. Bernard Waldimar Rivera ng Infectious Disease Office ng DOH, wala dapat ikaalarma ang taumbayan sa balitang ito. Ayon kay Dr. Rivera, nakikipag-ugnayan na raw ang DOH sa Department of National Defense.
Ngunit ngayon pa man, kanilang pinababatid na ang natagpuang "substance residue" na kung tawagin daw ay "Culture Chlosridiun Tetani" ay hindi ganun kapanganib taliwas sa mga lumabas na balita.
Ayon sa medical explanations ni Dr. Rivera, "ang Chlosridiun Tetani ay may buhay (living things). Nagkakaroon ito ng spores. ‘Yung spores na yan ang nagko-cause ng tetanus."
Idinagdag pa ni Rivera, mahirap aniyang gamitin sa paggawa ng bomba. Dahil kusa raw namamatay ang bakteryang ito kapag nagkakaroon ng oxygen.
Maliban lang daw kung sakali ang bakteryang ito ay direktang mapupunta sa isang "open wound" o kaya ay maisusubo sa bibig.
Naniniwala ako sa paliwanag ng DOH. Hindi sila nagbigay ng haka-haka kundi may malinaw na paliwanag. Hindi pinalalabo ang isyu tulad ng iba.
Hindi ko maunawaan ang ibang nasa katungkulan. Sa halip na magpakalma sa isip ng taumbayan. Para mauna lang, hindi pa kumpirmado inilalabas na ang balita.
HINDI kami nagmamagaling sa aking mga sinasabi at isinulat. Gusto ko lang linawin, kasama ito sa aming ini-imbestigahan.
COMPLAINTS; type BITAG<space>COMPLAINTS<space>(message)
FEEDBACK; type BITAG<space>FB><space>(message)
I-text at send sa 2333 (Globe/TouchMobile) o 334 (Smart/TalknText).
O tumawag sa telepono 932-5310 / 932-8919. Makinig sa DZME 1530 Khz, Lunes hanggang Biyernes, 9:00-10:00 ng umaga. At panoorin ang programang "BITAG" sa ABC-5, tuwing Sabado, 5:00-5:30 ng hapon. E-mail us: bitagabc_5@yahoo.com