Ang mga mayayabang sa nayon

ISA sa mga pinakasikat at nakatutuwang libangan sa baryo ay ang payabangan. Pataasan ng ihi. Karaniwang ginagawa ang payabangan sa harap ng tindahan. Nakaumpok ang maraming tao.

Unang nagyabang ang isang lalaki. "Masyadong malaki ang mansiyon ng ninong ko, inabot ako ng isang araw para mapuntahan ang mga kuwarto."

"Wala iyan," sabi ng isang lalaki. "Ang tiyuhin ko ay nagpunta ng Saudi Arabia at binisita ang palasyo ng prinsipe. Lumipas pa ang isang linggo bago niya nakita ang lahat ng mga kuwarto."

Sumabad ang ikatlong lalaki, "Wala iyan. Pumasok ang tiyuhin ko sa isang gusali na sa sobrang laki, inabot siya ng 25 taon bago nakalabas."

"Saang lugar ’yon?" tanong ng unang lalaki.

"Sa Muntinlupa. Bilanggo ang tiyo ko."

Umusbong ang tawanan.

Patuloy ang yabangan. Isang lalaki uli ang nagsalita, "Ang tiyuhin ko ay isang salesman. Nagbenta siya ng telebisyon at nakakuha siya ng P100 sa negosasyon."

Sumagot ang ikalawa, "Wala ’yan. Ang tiyuhin ko ay isang abogado at sa ilang minuto na payo, kumita siya ng P1,000."

"Lalong wala ’yan. Ang tiyuhin ko ay pastor sa isang simbahan. Nakakakuha siya ng sobrang dami ng pera tuwing Linggo kaya’t kailangan ng walong tao para kolektahin ang mga ito."