Malalaswang pelikula bumabalik na

NOONG si Armida Siguion-Reyna ang chairperson ng Movie and Television Review Classification Board (MTRCB), maraming sex films ang kinondena ng ilang grupong makabayan at Simbahan. Ayon sa mga moralista, ang mga pelikula ay pornography. Mga rally at pagbatikos sa print, radio at TV ang ipinukol sa "Scorpio Nights 2’’, ‘‘Sutla’’, at marami pang iba.

Nag-lie low ang mga producers at makalipas ang ilang taon balik na muli ang mga sex films. Marami ang nagtataka kung bakit pinahintulutan ng kasalukuyang Censor chief ang mga pelikula na sa titulo pa lang ay suggestive na gaya ng ‘‘Bakat,’’ ‘‘Gamitan,’’ ‘‘Laman,’’ ‘‘Prosti’’ at ‘‘Tukaan."

Ayon sa isang kaibigang movie reporter may sinusyuting na pelikula na ang pamagat ay ‘‘Mapaglarong Daliri.’’ Ayon pa rin sa reporter, isang pelikula na naglunsad sa isang bagong sex symbol ang may mga eksenang nagtatalik sa loob ng cabinet at tricycle.

Bakit nakalulusot ang mga pelikulang ganito? Nabago na ba ang panuntunan ng MTRCB kaugnay sa malalaswang panoorin? Ano ang ginagawa ng mga socio-civic religious groups at tahimik sila ngayon at pinababayaang magpalabas ng mga pelikulang yumuyurak sa dangal ng Pilipino, lalo na ng mga kabataan.

Mayaman ang sining at kultura natin. Maraming makabuluhan at may relevance na paksa na dapat isapelikula kaysa malalaswa.