3 congressman na di-nagbigay ng sustento sa anak natalo!

Alam n’yo bang pinulot sa kangkungan ang tatlong congressmen na hindi nagbibigay ng sustento sa kanilang mga anak?

Ayon sa aking bubuwit, happy birthday muna kay AFP Chief of Staff Gen. Diomedio Villanueva, Eric Gotuaco ng BluSkies Crackers; Rep. Elias Bulot ng Kalinga-Apayao; Rex Javar, Berna Serranillo at Gershom Gorgonio ng MBC.

Congratulations kay Mayor Sonny Belmonte ng Quezon City; Rep. Del de Guzman ng Marikina City; Rep. Danton Bueser ng Laguna; Rep. Willie Villarama ng Bulacan at kay Mayor Bobit Carlos ng Valenzuela City.

Happy wedding kina Silvestre ‘‘Rambo’’ Labay at Alwyn Palma.

Binabati ko rin sina Dr. Antonio Vertido ng NBI; PCSO GM Ver Angelo, Manny Garcia at Joey Tolentino ng PTA.

* * *

Alam n’yo bang natalong lahat ang mga paborito kong congressmen na hindi nagbibigay ng sustento sa kani-kanilang mga anak?

Ayon sa aking bubuwit, mukhang na-karma ang tatlong congressmen sapagkat pinulot sila sa kangkungan nitong nakalipas na election. Itong isang congressman ay lubhang dinamdam ang pagkatalo sapagkat hindi na siya masyadong nakikipag-usap ngayon sa kanyang mga kaibigan.

Ang pagkatalo niya ay isang senyales din na nawawalan na ng impluwensiya ang kanilang angkan sa kanilang bailiwick.

* * *

Ang isang congressmang natalo ay pilit na itinatanggi na anak niya ang batang isinilang ng isang nursing student sa Central Luzon. Samantalang kung makikita n’yo ang bata ay talaga namang hindi sila maitatangging mag-ama. Para silang pinagbiyak na inidoro este bunga.

Sa katunayan kinilala na ng kanyang ina ang bata bilang apo subalit ayaw pa ring angkinin ni Congressman. Kaya ayun, dahil itinatatwa ang sariling dugo, natalo siya sa election.

* * *

Ayon sa aking bubuwit, ang isa pang congressman na natalo ay taga-Metro Manila.

Noong maganda pa ang relasyon ni Congressman at ina ng bata, araw-araw ay dinadalaw, ipinapasyal at binibigyan din ng sustento hanggang mag-10 taong gulang.

Pero nang mag-away si Congressman at ina ng bata biglang itinatwa ’yung magandang batang babae. Bigla-biglang hindi raw pala niya anak kaya itinigil niya ang pagbibigay ng sustento.

Kaya ayun, ang resulta, naka-demanda ngayon si Congressman. At ang pinaka-masaklap, natalo nitong nakaraang election.

* * *

Ayon sa aking bubuwit, ang tatlong congressmen na natalo dahil hindi nagbibigay ng financial support sa kanilang anak ay sina Rep. Rico Fajardo ng Nueva Ecija; Rep. Ranjit Shahani ng Pangasinan at Rep. Romeo Candazo ng Marikina.