Nag-shopping way bayad-bayad

CEBU, Philippines — Nasikop ang usa ka 23-anyos nga babaye human siya nasakpan kay misulay sa pagkuha og nagkantidad og P5,499 nga lain-laing beauty products sulod sa usa ka drug store sa usa ka mall sa South Road Properties (SRP), Barangay Mambaling, Cebu City alas-11:50 sa buntag niadtong Septiyembre 27.

Ang suspetsada giila sa kapulisan nga si Eva, 23, residente sa Calanthe Street, Upper Balulang, Cagayan de Oro City.

Matud sa Police Station 11 sa Cebu City Police Office (CCPO), nahitabo ang insidente sulod sa branch sa maong drug store sa SRP.

Base sa inisyal nga imbestigasyon, nasakpan sa store sales associate ug security guard ang suspek samtang misulay kini og gawas dala ang mga beauty products nga wala bayri.

Human niini, gitugyan ang suspek sa Police Station 11 alang sa hustong disposisyon ug pagpasaka sa angay nga kaso. – IBM BANAT NEWS