Sexy outfit

Dear Tito Miguel,

Ako diay si Gian, taga Barangay Mabolo, Cebu City.

Naproblema ko sa akong uyab nga si Regina kay sexy kaayo siya manamit, ug usahay dili gyud ko komportable sa iyang mga sinina, labi na kung mugawas siya o moadto sa mga lugar nga daghan og tawo.

Nasulti na nako kaniya ang akong gibati ug akong tambag nga unta mopili siya og mas angay nga sinina, pero dili gyud siya mosunod sa akong tambag.

Sobraan ra gyud ka-sexy ay, kanang maka-komedya ko usahay nga nakuwangan og panapton ang iyang sapot .

Dili man nako gusto nga kontrolon siya o diktahan ang iyang gusto, pero isip iyang uyab, natural lang nga usahay makabati ko og kabalaka.

Mao kini akong pangutana: Unsaon nako ni pag-atubang? Kinahanglan ba nako nga dawaton nga mao gyud na iyang style, o naa ba koy katungod nga magbout kaniya nga usbon ang iyang pananamit tungod kay uyab ko niya?

Gusto nako nga respetohon nako siya ug iyang kagawasan, pero gusto pud nako nga masabtan niya ang akong gibati. Unsa may sakto nakong buhaton sa kini nga sitwasyon? — Gian

* * *

Gian,

Dili ka makabuot unsa iyang gusto suoton, kay iyaha na nga personal style. Pero mahimo nimo siya tambagan, naa ra niya kun maminaw o dili. Una, pasabta siya nga ang sinina nga suoton depende sa okasyon. Dili kinahanglan nga sa tanan higayon magpa-sexy siya.

Kinahanglan iyang ibagay bagay sa lugar, oras ug mga tawo nga iyang kuyog o makakita niya.

Ikaduha, pasabta nga kun magsige lang siya’g pa-sexy, kaniya ang mga tawo wala na’y paaboton o hinangpon pa, ka’y hapit na man gani diay siya maghubo. Kinahanglan lain lain iyang suoton aron dili sum-ol tan-awon.

Sa simbahan konserbatibo, sa trabahoan respetado, sa mall casual ba kaha.

Kun gusto siya magpa-sexy, ngadto sa gabii, kun duna sila’y night out sa iyang mga higala o kun mag-date mong duha. Labi na sa dagat, didto haom nga halos wala na siya’y suoton.

Ikatulo, ipakita kaniya ang mga tambag sa eksperto sa fashion. Lagmit usa ka tambag ka’y dili magpalabi’g pa-sexy, kay mabarato siya tan-awon. Sama ra sa sobra nga tattoo, sobra kataas sa kuko, sobra kataas sa pilok. Sa laktod, ang elegante nga babaye simple ra manamit, dili patagad.

Kun dili maminaw, pasagdi. Ka’y kun imo sige badlongon, samot na mo-insistir. Human sa imong mga tambag, ayaw na usba, ayaw na sitaha. Di ba matingala na ngano wa na ka’y ikasulti sa iya’ng panamit. Posible diha pa siya makaamgo nga basin duna siya’y angay usbon sa iyang istilo. — Tito Miguel

Magpatambag ka? Ipada kang Tito Miguel: 0991-318-9366