Bagyong Inday padayung nangharos

CEBU, Philippines — Bisan og wala motugpa sa kayutaan sa Pilipinas ang bagyong Inday, nakamugna ug nagbilin gihapon kini og dakong kadaut sa nagkadaiyang probinsya sa nasud.

Partikular ani didto sa Mindanao diin ubay-ubay nga mga sapa ang niawas ug gibaha ang mga komunidad sa palibot niini sama sa Sultan Kudarat, Cotabato, Maguindanao ug Lanao del Sur.

Sa Barangay Ngingir sa Calanogas, Lanao del Sur, lima ka tawo ang natabunang buhi tungod sa pagdahili sa mga dagkong bato ug yuta gikan sa bukid tungod sa padayung pagbunok sa ulan nga nakapahumok sa yuta kagahapon, Biyernes, Hulyo 10.

Sumala pa sa Calanogas Municipal Disaster Risk Reduction and Management Office ug sa tigpamaba sa Police Regional Office-Bangsamoro Autonomous Region, Capt. Steffie Salanguit, ang walay hunong nga pag-ulan sukad pa adtong Miyerkules dala sa bagyong Inday ang nakapahumok sa yuta didto.

Nakuha na hinuon ang mga patay’ng lawas pinaagi sa pagkubkob sa mga opisyal sa barangay ug kapolisan, tulo ka babaye ug duha ka lalaki ang nakalas.

Apan naa pay unom nga gikan sa duh aka pamilya ang padayung gipangita human natabunan ang ilang mga balay og yuta ug mga bato. Duha sab ang naangol.

Sa Maguindanao del Sur ug Maguindanao del Norte , 30,000 ka mga molupyo ang gipabakwit tungod sa pag-awas sa mga dakong suba didto sa ilang mga lugar sumala pa sa kadagkoan sa Bangsamoro Autonomous Region in Muslim Mindanao.

Si Army Major Gen. Jose Vladimir Cagara, commander sa Army’s 6th Infantry Division, ug Police Brig. Gen. Christopher Abecia, director sa PRO-BARMM, nagpadala na og suporta sa disaster response operations kauban sa mga local government units sa gipanglunopang mga probinsya.

Ang bagyong Inday (international name: Bavi) namentinar ang kusog kagahapon, Biyernes, samtang nagpadayun og iro north-northwestward sa Philippine Sea,  ug nagpabilin ang Signal No. 2 ubang bahin sa Northern Luzon.

Sa 5 p.m. bulletin sa PAGASA kagahapon, Biyernes, ang mata ni Inday nasigpatan gibanabanang 525 kilometros  east northeast sa Itbayat, Batanes.

Nagdala kini og maximum sustained winds nga 140 kilometers kada oras duol sa mata ug haguros nga 170 kph ug nag-irog sa gipaspason nga 20 kph.

Gipahibalo sa PAGASA nga ang maong bagyong posibleng magdala gihapon og mga pag-ulan sa ubang mga lugar sa nasud hangtud sa adlaw nga Lunes.—Gikan sa Philstar.com/IBM BANAT NEWS